ஆசிய தடகளம்: தங்கம் வென்றார் விகாஸ் கவுடா

by **logu** Fri Jul 05, 2013 7:43 am

புனே: ஆசிய தடகள சாம்பியன்ஷிப் வட்டு எறிதலில், இந்திய வீரர் விகாஸ் கவுடா தங்கம் வென்றார். பெண்களுக்கான 400 மீ., ஓட்டத்தில் பூவம்மா வெள்ளி பதக்கத்தை கைப்பற்றினார். ஆண்களுக்கான 10,000 மீ., ஓட்டத்தில் இந்தியாவின் ரதிராம் சைனி வெண்கலம் வென்றார்.
புனேயில், 20வது ஆசிய தடகள சாம்பியன்ஷிப் போட்டிகள் நடக்கின்றன. இதில் 43 நாடுகளை சேர்ந்த 577 வீரர், வீராங்கனைகள் பங்கேற்கின்றனர். நேற்று நடந்த ஆண்களுக்கான வட்டு எறிதலில், இந்தியாவின் விகாஸ் கவுடா 64.90 மீ., தூரம் எறிந்து முதலிடம் பிடித்தார். இதன்மூலம் இந்தியாவுக்கு முதல் தங்கப் பதக்கத்தை பெற்றுத் தந்தார். தவிர இவர், ஆசிய சாம்பியன்ஷிப் வரலாற்றில், தனது மூன்றாவது பதக்கத்தை வென்றார். முன்னதாக 2005 (தென் கொரியா), 2011ல் (ஜப்பான்) நடந்த இத்தொடர்களில் தலா ஒரு வெள்ளிப் பதக்கம் வென்றார். இந்த வெற்றியின் மூலம், அடுத்த மாதம் ரஷ்ய தலைநகர் மாஸ்கோவில் நடக்கவுள்ள உலக தடகள சாம்பியன்ஷிப் தொடருக்கு தகுதி பெற்றார்.
பூவம்மா வெள்ளி:
நேற்று நடந்த பெண்களுக்கான 400 மீ., ஓட்டத்தின் பைனலில், இந்தியா சார்பில் பூவம்மா, அனு மரியம் ஜோஸ், நிர்மலா ஆகியோர் பங்கேற்றனர். இதில் பந்தய தூரத்தை 53.37 வினாடியில் கடந்த இந்தியாவின் பூவம்மா, இரண்டாவது இடம் பிடித்து வெள்ளி பதக்கம் வென்றார்.
சீனாவின் யான்மின் ஜாவோ (52.49 வினாடி), லெபனானின் கிரிட்டா டாஸ்லாகியன் (53.43 வினாடி) ஆகியோர் முறையே தங்கம் மற்றும் வெண்கலம் கைப்பற்றினர். மற்ற இந்திய வீராங்கனைகளான அனு மரியம் ஜோஸ் (53.49 வினாடி) 4வது, நிர்மலா (55.40 வினாடி) 7வது இடத்தை பிடித்தனர்.
ரதிராம் வெண்கலம்:
ஆண்களுக்கான 10,000 மீ., ஓட்டத்தில், பந்தய தூரத்தை 29 நிமிடம், 35.42 வினாடிகளில் கடந்த இந்தியாவின் ரதிராம் சைனி, மூன்றாவது இடம் பிடித்து வெண்கலப் பதக்கத்தை கைப்பற்றினார். முதலிரண்டு இடங்களை பக்ரைனின் அலிமு பெகிலி கெப்ரே(28 நிமிடம், 47.26 வினாடி), பிலிசுமா ஷுகி ஜெலாஸ் (28 நிமிடம், 58.67 வினாடி) ஆகியோர் பிடித்தனர். மற்ற இந்திய வீரர்களான கேதா ராம் (29 நிமிடம், 35.72 வினாடி) 4வது, லட்சுமணன் (30 நிமிடம், 46.45 வினாடி) 5வது இடம் பிடித்தனர்.
400 மீ., ஓட்டம்:
ஆண்களுக்கான 400 மீ., ஓட்டத்தின் பைனலில் இந்தியா சார்பில் பங்கேற்ற முகமது குன்ஹீ (46.61 வினாடி), ஆரோக்கிய ராஜிவ் (46.63 வினாடி) ஆகியோர் முறையே 5, 6வது இடம் பிடித்து ஏமாற்றினர். இப்போட்டியின் முதல் மூன்று இடங்களை பிடித்த சவுதி அரேபியாவின் மாஸ்ரஹி யூசப் அகமது (45.08 வினாடி), பக்ரைனின் காமிஸ் அலி (45.65 வினாடி), ஜப்பானின் கனிமாரு யூஜோ (45.95 வினாடி) ஆகியோர் தங்கம், வெள்ளி, வெண்கலப் பதக்கத்தை கைப்பற்றினர்.
உயரம் தாண்டுதல்:
பெண்களுக்கான உயரம் தாண்டுதலில் இந்தியாவின் சகானா குமாரி 4வது இடம் பிடித்து ஏமாற்றினார். இவர், அதிகபட்சமாக 1.86 மீ., உயரம் தாண்டினார். மற்றொரு இந்திய வீராங்கனை மல்லிகா மண்டல் (1.75 மீ.,) 10வது இடம் பிடித்தார். முதல் மூன்று இடங்களை உஸ்பெகிஸ்தானின் நாடியா துசானோவா (1.90 மீ.,), சுவட்லனா ரத்ஜிவில் (1.88 மீ.,), கஜகஸ்தானின் மரினா அய்டோவா (1.88 மீ.,) ஆகியோர் பிடித்தனர்.
100 மீ., ஓட்டம்:
ஆண்களுக்கான 100 மீ., ஓட்டத்தின் அரையிறுதியில் இந்தியா சார்பில் பங்கேற்ற குஜ்ஜார் அனிருத் காளிதாஸ் 5வது இடம் பிடித்து, பைனலு<க்கு முன்னேறும் வாய்ப்பை இழந்தார். தங்கப் பதக்கத்தை சீனாவின் சு பிங்டியன் வென்றார்.
பெண்களுக்கான 100 மீ., ஓட்டத்தின் தகுதிச் சுற்றில் ஏமாற்றிய இந்தியாவின் ஆஷா ராய், ஜோசப் மெர்லின் ஆகியோர் பைனலுக்கு முன்னேறும் வாய்ப்பை இழந்தனர். மற்றொரு இந்திய வீராங்கனை சாரதா நாராயணன், போட்டியின் போது தகுதிநீக்கம் செய்யப்பட்டார். முதலிடம் பிடித்த சீனாவின் வெய் யங்லி தங்கப் பதக்கத்தை கைப்பற்றினார்.
ஐந்து பதக்கம்:
இத்தொடரில் இதுவரை இந்திய அணி ஒரு தங்கம், ஒரு வெள்ளி, மூன்று வெண்கலம் உட்பட மொத்தம் 5 பதக்கங்களுடன் 4வது இடத்தில் உள்ளது. ஐந்து தங்கம், இரண்டு வெள்ளி, ஒரு வெண்கலம் உட்பட மொத்தம் 8 பதக்கங்களுடன் சீனா முதலிடத்தில் உள்ளது. பக்ரைன், சவுதி அரேபியா தலா 2 தங்கப் பதக்கத்துடன் முறையே 2வது, 3வது இடத்தில் உள்ளன.