கிரிக்கெட் சூதாட்டக் குழுக்களின் தலைவர் ஐக்கிய அரபு அமீரகத்தில் இருப்பதாகக் கூறப்படுகிறது.

கிரிக்கெட்டில் சூதாட்டம், மேட்ச் ஃபிக்சிங், ஸ்பாட் ஃபிக்சிங் போன்றவை ஒன்றுடன் பின்னிப் பிணைந்தவை...

கிரிக்கெட் சூதாட்டக் குழுக்களின் தலைவர்
ஐக்கிய அரபு அமீரகத்தில் இருப்பதாகக் கூறப்படுகிறது. அங்கிருந்து,
பாகிஸ்தானில் உள்ள சூதாட்டக் குழுவின் தலைவர் மூலமாக இந்தியாவின் டெல்லி,
மும்பை, சென்னை, கொல்கத்தா போன்ற நகரங்களில் சூதாட்ட வலையமைப்பு
விரிவடைகிறது. இந்த நகரங்களில் ஐம்பதுக்கும் மேற்பட்ட சூதாட்டத் தரகர்கள்
மூலமாக கிரிக்கெட் சூதாட்டம் நடத்தப்படுகிறது.

இதில் பெரும்பாலும் பின்பற்றப்படும் முறை
சதவீத அடிப்படையில் பந்தயம் கட்டுவதாகும். அதன்படி, பந்தயம் கட்ட
விரும்புவர் சூதாட்ட தரகரிடம், 80-க்கு 20, 40-க்கு 60 என்பது போல பந்தயம்
கட்டுவார். 80-க்கு 20 என பந்தயம் கட்டுபவர் வெற்றிபெற்றால், பந்தயத்
தொகையில் 80 சதவீதம் கிடைக்கும். மீதி 20 சதவீதம் தரகருக்குச்
சென்றுவிடும்.



இந்தப் பந்தயத் தொகை, மற்றும் தகவல்களைப்
பரிமாறிக் கொள்ள கூரியர் போல செயல்படுவதற்கு உதவியாளர்களும்
இருக்கிறார்கள். இந்தச் சூதாட்டத்தின் அடுத்த படிநிலைதான் ஸ்பாட் ஃபிக்சிங்
மற்றும் மேட்ச் ஃபிக்சிங் போன்றவையாகும். தனக்கு அதிகம் லாபம் கிடைக்க
வேண்டும் என்று விரும்பும் தரகர், நேரடியாக கிரிக்கெட் வீரரை ஏதாவது ஒரு
வழியில் தொடர்பு கொண்டு, தனக்குச் சாதகமாக ஆட்டத்தில் நடந்து கொள்ளும்படி
கேட்டுக் கொள்வார்.



உதாரணத்துக்கு ஒரு நோபால் போடுவது, ஒரு
ஓவரில் குறிப்பிட்ட ரன்கள் எடுப்பது என ஏதாவது ஒரு "ஸ்பாட்" அல்லது நிகழ்வை
முன்கூட்டியே தீர்மானித்துவிட்டு, அதற்கேற்றாற்போல பந்தயம் கட்டி தரகர்கள்
லாபம் சம்பாதிப்பார்கள். சூதாட்டத் தரகர்களின் விருப்பப்படி நடந்து
கொள்வதற்கு தொப்பியைக் காட்டுவது, ஷூவைக் கட்டுவது போன்ற ஏதாவது ஒரு
சைகையைச் செய்வார்.

பொதுவாக சூதாட்டத் தரகர்கள் 3 வகையில்
முறைகேடுகளில் ஈடுபடுகிறார்கள். முதலாவது, சூதாடுபவர்களிடம் பந்தயம்
கட்டுவது, இரண்டாவது, ஓரிரு வீரர்களை தங்கள் வலையில் வீழ்த்தி ஆட்டத்தின்
நிகழ்வைத் தீர்மானிக்கும் ஸ்பாட் ஃபிக்சிங், மூன்றாவது ஆட்டத்தின் முடிவையே
மாற்றும் மேட்ச் ஃபிக்சிங். இதற்கு நிறைய வீரர்களின் ஆதரவு தேவைப்படும்.



சூதாட்டம், ஸ்பாட் ஃபிக்சிங்
போன்றவையெல்லாம் கிரிக்கெட்டுக்கு புதியவை அல்ல. ஆட்டத்தின் போக்கை
முறைகேடாக மாற்றும் மோசடி 30 ஆண்டுகளுக்கு முன்பே தொடங்கிவிட்டதாகக்
கூறப்படுகிறது.

சூதாட்ட வலையில் சிக்கிய கிரிக்கெட் நட்சத்திரங்கள்

1980-களிலேயே கிரிக்கெட் உலகில் புகுந்துவிட்ட மேட்ச் ஃபிக்சிங் மோசடி,
இரண்டாயிரமாவது ஆண்டில் விஸ்வரூபம் எடுத்தது. இந்திய சுற்றுப் பயணத்தில்
போது தென்னாப்பிரிக்க அணி கேப்டன் ஹன்சே குரோனே சூதாட்டத்தில் ஈடுபட்டதாக
வெளியான தகவல், அதிர்ச்சி அலைகளை ஏற்படுத்தியது. எனினும் இதுகுறித்து
இந்தியாவில் விசாரணை நடத்த தென்னாப்பிரிக்க கிரிக்கெட் வாரியம் மறுப்புத்
தெரிவித்தது.

இதையடுத்து இந்த விவகாரம் தென்னாப்பிரிக்க நீதிமன்றத்துக்குச் சென்றது.
அங்கு குரோனே மீதான குற்றச்சாட்டு நிருபிக்கப்பட்டதையடுத்து, அனைத்து
தரப்பு கிரிக்கெட் போட்டிகளிலும் விளையாட அவருக்கு தடைவிதிக்கப்பட்டது.

பாகிஸ்தானை சேர்ந்த சலீம் மாலிக், இந்திய அணி வீரர்கள் முகமது
அசாருதீன், அஜய் ஜடேஜா ஆகியோருக்கும் சூதாட்டத்தில் தொடர்பு இருப்பதாக
குரோனே அளித்த தகவல்களின் அடிப்படையில், விசாரணை முடுக்கி விடப்பட்டது.

அசாருதீனுக்கு அயுள் காலத் தடையும், ஜடேஜாவுக்கு 4 ஆண்டுகள் தடையும்
விதிக்கப்பட்டது. தென்னாப்பிக்க வீரர்களான கிப்ஸ், போயே ஆகியோருக்கும்
சூதாட்டத்தில் தொடர்பு இருப்பதாக டெல்லி போலீசார் தெரிவித்திருந்த போதும்
அவர்கள் மீதான குற்றச்சாட்டுகளுக்கு போதிய ஆதாரம் இல்லாததால்
தண்டனையிலிருந்து அவர்கள் தப்பினர்.

2010-ஆண்டு பாகிஸ்தான் அணி இங்கிலந்தில் சுற்றுப்பயணம் செய்த போது
சூதாட்டக்காரர்களிடம் பணம் பெற்றுக்கொண்டு பாகிஸ்தான் வீரர்கள் ஸ்பாட்
பிக்சிங் சூதாட்டத்தில் ஈடுபட்டனர். சூதாட்ட தரகர் மசார் மஜீத்திடம் பணம்
பெற்றுக்கொண்டு இங்கிலந்து அணிக்கெதிரான போட்டியில், வேகப்பந்து வீச்சாளர்
முகமது அசீப் வேண்டுமேமென்றே நோபால் வீசியதும், இதில் கேப்டன் சல்மான் பட்,
மற்றொரு வேகப்பந்து வீச்சாளர் முகமது ஆமிர் ஆகியோருக்கும் தொடர்பு
இருப்பதும் தெரிய வந்தது.



இதையடுத்து அவர்களுக்கு கிரிக்கெட் போட்டிகளில் கலந்து கொள்ள பாகிஸ்தான்
கிரிக்கெட் வாரியம் தடைவிதித்தது. வீரர்களின் சூதாட்ட விவகாரம் கிரிமினல்
குற்றமாக பதிவு செய்யப்பட்டு லண்டன் நீதிமன்றத்தில் விசாரணை நடத்தப்பட்டது.
விசாரணையின் முடிவில் சல்மான் பட்டுக்கு 10 ஆண்டுகளும், அசீப்புக்கு 7
ஆண்டுகளும், ஆமிருக்கு 5 ஆண்டுகளும் சிறை தண்டனை விதிக்கப்பட்டது. அவர்கள்
அவர்களின் மேல் முறையீடை அடுத்து தண்டனை காலம் குறைக்கப்பட்டது.

இங்கிலந்து கவுண்டி போட்டிகளில், ஸ்பாட் பிக்சிங் சூதாட்டத்தில் ஈடுபட்ட
பாகிஸ்தானை சேர்ந்த டேனிஷ் கனேரியாவுக்கு ஆயுட்காலத்தடையும், மெர்வின்
வெஸ்ட்ஃபீல்ட் என்ற வீரருக்கு ஐந்து ஆண்டுகளும் விளையாட
தடைவிதிக்கப்பட்டது.

கடந்தாண்டு நடைபெற்ற ஐ.பி.ல் ஐந்தாவது சீசனில், 5 வீரர்கள்
சூதாட்டத்தில் ஈடுபட்டதை தனியார் தொலைக்காட்சி நிறுவனம் ஒன்று
அம்பலப்படுத்தியது. இதையடுத்து சூதாட்டத்தில் தொடர்புடைய மோனிஷ் மிஸ்ரா,
ஸ்ரீவத்சவா, சுதீந்திரா, ஹர்மீத் சிங், அபினவ் பாலி ஆகிய ஐந்து
வீரர்களுக்கு பி.சி.சி.ஐ போட்டிகளில் பங்கேற்க தடை விதித்தது.