பிக்குகள் தாக்கப்பட்டதன் எதிரொலி - மீனவர்கள் மீது இலங்கை கடற்படையினர் வாளால் வெட்டி தாக்குதல்!

தமிழ்நாடு,
நாகப்பட்டினம் மாவட்டத்தைச் சேர்ந்த மீனவர்கள் மீது இன்று அதிகாலை
இலங்கைக் கடற்படையினர் வாளால் வெட்டி தாக்குதல் நடத்தியுள்ளதாக
தெரிவிக்கப்படுகிறது.




இன்று அதிகாலை 3.30 மணியளவில் நாகபட்டினத்தைச் சேர்ந்த கோடியக்கரை தென் கிழக்கே மீன் பிடித்து கொண்டிருந்தனர்.

அப்போது ரோந்து சென்ற இலங்கைக்
கடற்படையினர், மீனவர்களின் படகை வழிமறித்து, அவர்கள் வைத்திருந்த வாளால்
சரமாரியாக வெட்டியதாக தெரிவிக்கப்படுகிறது.

இத்தாக்குதல் சம்பவத்தில் கண்ணையன்,
செல்வக்குமார், பொன்னுசாமி, சசிகுமார் ஆகிய மீனவர்களுகு்கு கை, கால் தொடை
பகுதியில் பலத்த காயங்கள ஏற்பட்டுள்ளதாக தெரிவிக்கப்படுகிறது.

அதன் பிறகும் சிங்கள கடற்படை
அட்டூழியம் அடங்கவில்லை.அவர்கள் பிடித்து வைத்திருந்த மீன்களையும்,
வலைகளையும் பறித்து கொண்டு சென்று விட்டனர்.

இலங்கைக் கடற்படை சரமாரியாக அரிவாளால்
வெட்டியதில் படகும் சேதம் அடைந்தது. அரிவாள் வெட்டில் காயம் அடைந்த 4
மீனவர்கள் ஏனைய மீனவர்களின் துணையுடன் ஆறுகாட்டுத்துறை கடற்கரைக்கு
வந்தனர்.

பின்னர் வேதாரண்யம் அரசு
மருத்துவமனைக்கு கொண்டு செல்லப்பட்டு சிகிச்சை அளிக்கப்பட்டது. பலத்த
வெட்டு காயம் அடைந்த மீனவர்கள் கண்ணையன், பொன்னுசாமி, சசிகுமார் ஆகியோர்
தஞ்சை மருத்துவக் கல்லூரி மருத்துவமனைக்கு அனுப்பி வைக்கப்பட்டனர்.

நாகை மீனவர்கள் மீது சிங்கள
கடற்படையின் தாக்குதல் அடிக்கடி நடைபெற்று வருகிறது. இதனால் நாகை மீனவ
கிராமங்களில் பதட்டம் நிலவுகிறது. சிங்கள கடற்படை அட்டூழியத்திற்கு
முற்றுப்புள்ளி வைக்க வேண்டும் என மீனவ கிராம மக்கள் தெரிவித்துள்ளனர்.

கடந்த சில நாட்களுக்கு முன்
தூத்துக்குடி மீனவர்களை இலங்கை கடற்படை சிறை பிடித்து சென்றனர். தற்போது
நாகை மீனவர்களை சிங்கள கடற்படை அரிவாளால் வெட்டிய சம்பவம் நடைபெற்று
உள்ளது.