ரெயில் கட்டணம் விரைவில் உயர்கிறது: மத்திய மந்திரி சூசக தகவல்

மத்திய ரெயில்வே துறையை லல்லு பிரசாத் யாதவ், மம்தா பானர்ஜி ஆகியோர் வகித்தபோது சாதாரண வகுப்பு ரெயில் கட்டணங்கள் உயர்த்தப்படவில்லை.

மம்தா பானர்ஜி மேற்கு வங்க முதல்-மந்திரி ஆன பிறகு ரெயில்வே மந்திரியாக தினேஷ் திவேதி ரெயில்வே இலாகாவில் நவீன சீர்திருத்தங்கள் செய்ய நடவடிக்கை எடுத்தார். இந்திய ரெயில்வேயை நவீனப்படுத்துவதற்காக சாம்பிட்ரோதா தலைமையில் ஒரு குழு, ரெயில்வே பாதுகாப்பை மேம்படுத்த அணில் ககோத்கர் தலைமையில் ஒரு குழு என 2 குழுக்களை தினேஷ் திவேதி நியமித்தார்.

அந்த குழுக்கள் கொடுத்த அறிக்கையின்படி ரெயில்வேயை நவீனப்படுத்துவதற்காக அவர் கட்டணத்தை உயர்த்தினார். இதன் காரணமாக தினேஷ் திவேதி ரெயில் மந்திரி பதவியை இழக்க நேரிட்டது.

அதன் பிறகு ரெயில் மந்திரி ஆக்கப்பட்ட முகுல்ராய், குழுக்கள் அறிக்கையை அப்படியே கிடப்பில் போட்டுவிட்டார். இந்த நிலையில் மத்திய கூட்டணியில் இருந்து திரிணாமுல் காங்கிரஸ் கட்சி விலகியதால், முகுல்ராயிடம் இருந்த ரெயில்வே இலாகா காங்கிரஸ் கட்சியைச் சேர்ந்த சி.பி.ஜோஷியிடம் ஒப்படைக்கப்பட்டது.

இதையடுத்து சி.பி.ஜோஷி ரெயில்வே இலாகாவை சீர்திருத்தம் செய்யும் நடவடிக்கைகளில் ஈடுபட்டுள்ளார். சாம்பிட்ரோதா, அணில் ககோத்கர் ஆகியோர் கொடுத்த அறிக்கைகளை அமல்படுத்த சி.பி.ஜோஷி திட்டமிட்டுள்ளதாகத் தெரிகிறது.

ரெயில்வேயை நவீனப்படுத்தவும், பாதுகாப்புக்கும், அவர் முன்னுரிமை கொடுப்பார் என்று தெரிய வந்துள்ளது. இதன் காரணமாக, ரெயில் கட்டணம் சரக்கு கட்டணம் உள்பட ரெயில்வே தொடர்பான எல்லா கட்டணங்களையும் உயர்த்த ஜோஷி முடிவு செய்துள்ளார்.

பயணிகள் ரெயில் கட்டணத்தை உயர்த்தப் போவதை மத்திய மந்திரி சி.பி.ஜோஷி சூசகமாக தெரிவித்துள்ளார். இதுதொடர்பாக அவர் கூறுகையில், ரெயில்வேயை நவீனப்படுத்த நிறைய பணம் தேவைப்படுகிறது. எனவே கட்டணத்தை உயர்த்த பரிந்துரை செய்யப்பட்டுள் ளது. அந்த பரிந்துரை மத்திய மந்திரிசபை ஒப்புதலுக்கு அனுப்பி வைக்கப்பட்டுள்ளது என்றார்.

எனவே மத்திய மந்திரி சபை ஒப்புதல் கொடுத்ததும் ரெயில் கட்டண உயர்வு அமலுக்கு வரும். ஆனால் ரெயில் கட்டணத்தை உயர்த்த காலஅவகாசம் எதுவும் நிர்ணயிக்கப்படவில்லை என்று ரெயில்வே வாரியத் தலைவர் வினய் மிட்டல் தெரிவித்தார்.

ரெயில் கட்டண உயர்வு அனைத்து மட்டத்திலும் இருக்கும் என்பதை அவர் உறுதி செய்தார். ரெயில் கட்டணம் உயர்வு சாதாரண மக்களை பாதிக்கும் என்று கூறி கடந்த பல ஆண்டுகளாக இரண்டாம் வகுப்பு கட்டணங்கள் பெரிய அளவில் உயர்த்தப்படாமல் இருந்தது. எனவே இந்த தடவை ரெயில் கட்டண உயர்வு கடுமையாக இருக்கும் என்று கூறப்படுகிறது.

பண்ணுங்கடா ?பண்ணுங்கடா ?பண்ணுங்கடா ?