அவசரகால கதவை திறந்து குதித்த பயணி : சென்னை விமான நிலையத்தில் பரபரப்பு

by **logu** Tue May 15, 2012 7:18 am

சென்னை: துபாயில் இருந்து சென்னை வந்த விமானத்தில், பயணி ஒருவர் அவசர கால
கதவை திறந்து, கீழே குதித்து ஓடுபாதையில் ஓட முயன்ற சம்பவம், சென்னை விமான
நிலையத்தில் பரபரப்பை ஏற்படுத்தியது. அவரை கைது செய்து போலீசார் விசாரணை
நடத்தி வருகின்றனர். துபாயில் இருந்து, நேற்று காலை 5.45 மணிக்கு ஏர்-
இந்தியா பயணிகள் விமானம் சென்னைக்கு வந்தது. விமானத்தில், 145 பேர்
பயணித்தனர். விமானம் சென்னை பன்னாட்டு விமான நிலையத்தில் இறங்கி, பயணிகளை
இறக்கிவிட தயாரானது. பயணிகளும் எழுந்து வரிசையில் நின்றனர். அப்போது ஒரு
பயணி, விமானத்தின் அவசர கால வழியை வேகமாக திறந்தார்.

எச்சரிக்கை :
இதை பார்த்ததும் சக பயணிகளும், விமானத்தில் இருந்த பணியாளர்களும் அவரை அந்த
வழியை திறக்க வேண்டாம் என்று எச்சரித்தனர். ஆனால், அதை கண்டுகொள்ளாத
அப்பயணி, அவசர கால கதவை திறந்து விமானத்தில் 15 அடி உயரத்தில் இருந்து,
தரையில் குதித்து ஓடுபாதையை நோக்கி ஓடினார். இது குறித்து, தலைமை விமானி
ஏர் -இந்தியா அதிகாரிகளுக்கும், விமான நிலைய பாதுகாப்பு அதிகாரிகளுக்கும்
உடனடியாக தகவல் கொடுத்தார். மத்திய தொழிலக பாதுகாப்பு படை போலீசார் அந்த
நபரை துரத்தி பிடித்தனர். விசாரணையில் அவர் திருச்சியைச் சேர்ந்த கமல்பாஷா,
27 என்பதும், இயந்திரவியல் பொறியாளர் என்பதும் தெரியவந்தது. தொடர்
விசாரணையில், அவர் முன்னுக்கு பின் முரணாக பதிலளித்தார். மனநிலை
பாதிக்கப்பட்டவராக இருக்கலாம் என்று சந்தேகமடைந்த அதிகாரிகள், அவரை
உடனடியாக விமான நிலையத்தில் உள்ள மருத்துவமனையில் சேர்த்தனர்.

புதிர்
: கடந்த நான்கு மாதங்களுக்கு முன், துபாயில் உள்ள ஒரு நிறுவனத்தில்
கமல்பாஷா வேலைக்கு சேர்ந்துள்ளார். பணி பிடிக்காததால், சொந்த ஊருக்கு
திரும்ப திட்டமிட்டார். இது குறித்து, கடந்த மாதமே வீட்டிற்கும் தகவல்
தெரிவித்துள்ளார். ஆனால், விமானத்தில் இருந்து அவசர கால கதவை திறந்து
இறங்கி ஓடியது ஏன் என்பது, புதிராகவே உள்ளது. பயங்கரவாத செயல்களில் ஈடுபட
முயன்றாரா அல்லது கடத்தல் பொருட்களை ஏதேனும் கொண்டு வந்தாரா என்பது
குறித்து விசாரணை நடந்து வருகிறது. பயங்கரவாத தடுப்பு பிரிவு, கியூ
பிராஞ்ச், உளவுத்துறை போலீசார் இவரிடம் விசாரித்தனர். சுங்கவரித்துறை
அதிகாரிகளும் விசாரணை நடத்தினர். பின்னர், சென்னை விமான நிலைய போலீசாரிடம்
இவர் ஒப்படைக்கப்பட்டுள்ளார். போலீசார், கமல்பாஷாவிடம் தீவிர விசாரணை
நடத்தி வருகின்றனர். இந்த சம்பவம், சென்னை விமான நிலையத்தில் நேற்று பெரும்
பரபரப்பை ஏற்படுத்தியது.