மரங்கள் வளர்த்தால் பணம் தருவோம்: கேரள வனத்துறை புதிய அறிவிப்பு

திருவனந்தபுரம்: வீடுகளை சுற்றியுள்ள பகுதிகள் மற்றும் தங்களுக்கு
சொந்தமான நிலங்களில், பொதுமக்கள் மரங்களை வளர்த்தால், ஊக்கத் தொகை
தரப்படும் என, கேரள வனத்துறை அறிவித்துள்ளது.

கேரளாவில் மரங்கள் வளர்ப்பதை ஊக்கப்படுத்த, அம்மாநில வனத்துறை புதிய
திட்டத்தை அறிமுகப்படுத்தி உள்ளது. இதன் மூலம், வீட்டைச் சுற்றியுள்ள பகுதி
மற்றும் தங்களுக்கு சொந்தமான நிலங்களில், மரங்களை வளர்ப்போருக்கு
ஊக்கத்தொகை வழங்கப்படும். அதற்காக எந்த மரத்தை வளர்த்தாலும், ஊக்கத் தொகை
தரப்படாது. தேக்கு, சந்தனம், சீமை நூக்கு (கருங்காலி போன்ற ஒருவகை),
ஆஞ்ஜெல்லி, பலா, ரோஸ்வுட், கம்பாகம், கும்பில், குன்னிவாகா, தேம்பாவு
போன்ற, 10 வகையான மரங்களை வளர்க்கவேண்டும். இதற்காக மாநில வனத் துறையின்
சமூக காடுகள் வளர்ப்புப் பிரிவினர், அரசு நிர்ணயித்த விலையில்,
மரக்கன்றுகளை வழங்குகின்றனர்.

ஒரு ஏக்கர் (100 சென்ட்) நிலத்தில், 250 மரக்கன்றுகளை நடமுடியும் என,
மாநில வனத்துறை கணக்கிட்டுள்ளது. ஊக்கத் தொகை வழங்குவதற்காக மரங்கள்
வளர்ப்பது மூன்று வகைகளாக பிரிக்கப்பட்டுள்ளது. தங்களது நிலத்தில், 50
முதல் 200 மரக்கன்றுகளை நட்டு வளர்ப்பவர்களுக்கு ஒரு மரத்திற்கு, 50
ரூபாயும், 210 முதல் 400 வரை மரங்களை வளர்ப்பவர்களுக்கு ஒரு மரத்திற்கு, 40
ரூபாயும், 401 முதல் 625 வரை ஒரு மரத்திற்கு, 30 ரூபாயும் ஊக்கத் தொகை
வழங்கப்படும். மரங்கள் வளர்க்கப்பட்டுள்ளதை வனத்துறையினர் பார்வையிட்டு
உறுதி செய்த பின்னர், 50 சதவீத ஊக்கத் தொகை முதல் ஆண்டிலும், மீதமுள்ள தொகை
மூன்றாவது ஆண்டிலும் வழங்கப்படும். மரங்களின் வளர்ச்சி குறித்து,
அதிகாரிகள் ஐந்தாவது மற்றும் 10வது ஆண்டுகளில் மறு ஆய்வு செய்வர். அதன்
பிறகு சிறப்பு பரிசாக, ஒவ்வொரு வகையில் சிறப்பாக மரங்களை வளர்த்
தவர்களுக்கு, மேலும் பணம் வழங்கப்படும்.