இந்திய பந்துவீச்சும் அம்போ! * மைக்கேல் கிளார்க் இரட்டை சதம் * வலுவான நிலையில் ஆஸி.,

by **mmani** Thu Jan 05, 2012 7:29 am

சிட்னி: சிட்னி
டெஸ்டில் முதலில் இந்திய பேட்ஸ்மேன்கள் சொதப்பினர். நேற்று பவுலர்களும்
தங்கள் பங்கிற்கு அணியை கைவிட்டனர். இவர்களது பந்துவீச்சு சுத்தமாக எடுபடாத
நிலையில், ஆஸ்திரேலிய அணி இமாலய ஸ்கோரை நோக்கி முன்னேறுகிறது. கேப்டன்
மைக்கேல் கிளார்க்கின் இரட்டை சதம், பாண்டிங்கின் சதம் அணிக்கு வலுவான
அடித்தளம் அமைத்தது.
ஆஸ்திரேலியா சென்றுள்ள இந்திய அணி நான்கு
போட்டிகள் கொண்ட டெஸ்ட் தொடரில் பங்கேற்று வருகிறது. முதல் டெஸ்டில்
இந்தியா தோல்வி அடைந்தது. இரண்டாவது டெஸ்ட் சிட்னியில் நடக்கிறது.
இந்திய
அணி முதல் இன்னிங்சில் 191 ரன்கள் எடுத்தது. முதல் நாள் ஆட்டநேர முடிவில்,
ஆஸ்திரேலிய அணி முதல் இன்னிங்சில் 3 விக்கெட்டுக்கு 116 ரன்கள்
எடுத்திருந்தது.
தவறான வியூகம்:
நேற்று
இரண்டாவது நாள் ஆட்டம் நடந்தது. பாண்டிங், கிளார்க் இருவரும் முதலில் நிதான
ஆட்டத்தை வெளிப்படுத்தினர். போகப் போக அதிரடிக்கு மாறிய இவர்களை பிரிக்க,
தோனி எடுத்த முயற்சிகள் எதுவும் பலிக்கவில்லை. "பேட்டிங்கிற்கு' சாதகமாக
மாறிவிட்ட ஆடுகளத்தில் அஷ்வினால் ஒன்றும் செய்யமுடியவில்லை. தவிர, கேப்டன்
தோனியின் "பீல்டிங்' வியூகங்களும் எதிரணிக்கு சாதகமாக அமைய இருவரும்,
ரன்குவிப்பில் ஈடுபட்டனர்.
பாண்டிங் சதம்:
சிறப்பான
ஆட்டத்தை வெளிப்படுத்திய கேப்டன் கிளார்க், தனது 18வது சதம் கடந்தார்.
மறுபக்கம் 99 ரன்னில் "ரன் அவுட்' வாய்ப்பில் இருந்து தப்பிய பாண்டிங்,
நீண்ட இடைவெளிக்குப் பின் டெஸ்ட் அரங்கில் 40வது சதம் அடித்தார். நான்காவது
விக்கெட்டுக்கு இந்த ஜோடி 288 ரன்கள் சேர்த்த நிலையில், பாண்டிங் (134),
இஷாந்த் சர்மாவிடம் வீழ்ந்தார்.
கிளார்க் அபாரம்:
பின்
கிளார்க்குடன், ஹசி இணைந்தார். இந்த ஜோடி அதிரடியாக ரன்கள் சேர்த்தது.
கிளார்க் 182 ரன்கள் எடுத்த போது, இஷாந்த் சர்மா "கேட்ச்' வாய்ப்பை நழுவ
விட்டார். இதை நன்கு பயன்படுத்திய கிளார்க், சர்வதேச அரங்கில் முதல் இரட்டை
சதம் அடித்தார். மறுமுனையில் அஷ்வின் சுழலில் அடுத்தடுத்து 2 பவுண்டரி,
சிக்சர் விளாசிய ஹசி, தனது 28வது அரைசதம் கடந்தார்.
சேவக்,
விராத் கோஹ்லி என "பார்ட் டைம்' பவுலர்கள் வந்தும், இந்த ஜோடியையும்
பிரிக்கமுடியவில்லை. பழைய பந்தில் "சுவிங்' செய்வதில் வல்லவரான ஜாகிர்
கான், பவுலிங்கும் எடுபடவில்லை. முதல் நாளில் 13 விக்கெட்டுகள் சரிந்தன.
ஆனால் நேற்று இந்திய பவுலர்களால் ஒரே ஒரு விக்கெட்டை தான் கைப்பற்ற
முடிந்தது.
இமாலய இலக்கு:
இரண்டாம் நாள்
ஆட்டநேர முடிவில், ஆஸ்திரேலிய அணி முதல் இன்னிங்சில் 4 விக்கெட்டுக்கு 482
ரன்கள் எடுத்து, 291 ரன்கள் முன்னிலை பெற்றிருந்தது. கிளார்க் (251), ஹசி
(55) அவுட்டாகாமல் இருந்தனர்.
கைவசம் 6 விக்கெட் உள்ள நிலையில்,
ஆஸ்திரேலிய அணி இன்று விரைவான ரன்குவிப்பில் ஈடுபடும். இதன் மூலம் முதல்
இன்னிங்சில் இமாலய இலக்கை எட்டும். இரண்டாவது இன்னிங்சில் பேட்ஸ்மேன்கள்
எழுச்சி பெறவில்லை எனில், இந்திய அணி இன்னிங்ஸ் தப்புவது கடினம்.
---
தெரிந்தே தவறு செய்த தோனி
சிட்னி
ஆடுகளம் சமீபகாலமாக முதலில் வேகப்பந்து வீச்சுக்கும், அடுத்து
பேட்டிங்கிற்கும் சாதகமாக இருந்து வருகிறது. கடந்த 2010, 2011ல் முதலில்
களமிறங்கிய ஆஸ்திரேலிய அணி 127, 281 ரன்களுக்கு ஆல் அவுட்டானது. அடுத்து
களமிறங்கிய பாகிஸ்தான் (333), இங்கிலாந்து (644) அணிகள் அதிக ரன்களை
எடுத்தன. இம்முறை ஆஸ்திரேலிய அணி பெரிய இலக்கை (482/4) நோக்கி செல்கிறது.
இந்த விவரம் தெரிந்தே தோனி, நேற்று முன்தினம் "டாஸ்' வென்று "பேட்டிங்'
தேர்வு செய்தது ஏனோ தெரியவில்லை.
----
தேனிலவுக்கு செல்லவில்லை
இந்திய
சுழல் ஜாம்பவான் கும்ளே கூறுகையில்,""சேவக், டிராவிட், லட்சுமண், ஆகியோர்
பேட்டிங்கில் மீண்டு வந்து, தாங்கள் ஏன் சிறந்த அணி என்பதை உலகிற்கு
நிரூபித்துக் காட்டவேண்டும். ஆஸ்திரேலியாவுக்கு தேனிலவுக்கு செல்லவில்லை
என்பதை, இவர்கள் நினைவில் கொள்ள வேண்டும். காலையில் "டிவி'யில் பார்த்த
போது, பாண்டிங்-கிளார்க் "பேட்' செய்து கொண்டிருந்தனர். மழை வந்துவிட்டது
போல, முதல்நாள் தொகுப்பை தான் ஒளிபரப்புகின்றனர் என்று நினைத்தேன். ஆனால்,
"டிவி'யின் வலதுபுறத்தில் நேரடி ஒளிபரப்பு என்பதை பார்த்தபின் அதிர்ந்து
போனேன்,''என்றார்.
---------
சபாஷ் பாண்டிங்
கடந்த
உலக கோப்பை தொடருக்குப் பின், ஒருநாள் மற்றும் டெஸ்ட் அணியின் கேப்டன்
பதவி பாண்டிங்கிடம் இருந்து பறிக்கப்பட்டது. சமீபகாலமாக பேட்டிங்கில்
சொதப்பிய இவர், கடைசியாக விளையாடிய 33 டெஸ்ட் இன்னிங்சில் ஒரு சதம் கூட
அடிக்கவில்லை. இருப்பினும் இந்தியாவுக்கு எதிரான தொடரில் இவருக்கு வாய்ப்பு
தரப்பட்டது.
மெல்போர்னில் இரு இன்னிங்சிலும் அரைசதம் அடித்த
பாண்டிங், நேற்று சிட்னியில் தனது 40வது சதம் (160 டெஸ்ட்) கடந்தார்.
சர்வதேச டெஸ்ட் அரங்கில் அதிக சதம் கடந்தவர்கள் வரிசையில், சச்சின் (51),
காலிசை (41) அடுத்து, தொடர்ந்து மூன்றாவது இடத்தில் உள்ளார்.
---
"நம்பர்-1' ஜோடி
நேற்று
பாண்டிங்,கிளார்க் ஜோடி 4வது விக்கெட்டுக்கு 288 ரன்கள் சேர்த்தது.
ஆஸ்திரேலியா சார்பில் இந்திய அணிக்கு எதிராக, எந்த ஒரு விக்கெட்டுக்கும்
எடுக்கப்பட்ட அதிகபட்ச ரன்கள் இதுதான். இதற்கு முன் கடந்த 1999ல்
(அடிலெய்டு), பாண்டிங்-ஸ்டீவ் வாக் ஜோடி 239 ரன்கள் (5வது விக்.,)
எடுத்திருந்தது.
---
அதிகபட்ச ஸ்கோர்
சிட்னி
மைதானத்தில் இந்தியாவுக்கு எதிரான டெஸ்டில் அதிகபட்ச ரன்கள் எடுத்த வீரர்
என்ற பெருமை பெற்றார் கிளார்க் (251*). அடுத்த இரு இடங்களில் ஜஸ்டின்
லாங்கர் (223), கிரெக் சாப்பல் (204) உள்ளனர்.
* தவிர,
ஒட்டுமொத்தமாக இந்தியாவுக்கு எதிரான டெஸ்டில், ஒரு இன்னிங்சில் அதிக ரன்கள்
எடுத்த வீரர் வரிசையில், லட்சுமண் (281), பாண்டிங்கிற்கு (257) அடுத்து,
மூன்றாவது இடத்தை பெற்றுள்ளார்.
---
இன்னொரு "நம்பர்' தான்
சச்சின்
கூறுகையில்,""எனது 100வது சதம் பற்றி அதிகம் பேசப்படுகிறது. என்னைப்
பொறுத்தவரை, அதைப்பற்றி நினைக்கவே இல்லை. அது இன்னொரு "நம்பர்' தான்.
இத்தொடரில் எனது நோக்கம் மகிழ்ச்சியாக கிரிக்கெட் விளையாடி, வெற்றி பெறுவது
தான்,''என்றார்.
-------
சிக்கலில் கோஹ்லி
சிட்னி ரசிகர்களை நோக்கி ஆபாசமாக சைகை செய்த இந்திய வீரர் விராத் கோஹ்லி சிக்கலில் மாட்டிக் கொண்டுள்ளார்.
சிட்னி
மைதானத்தின் ஒரு பகுதியில் இருந்த ரசிகர்கள் தகாத வார்த்தைகளால் கோஹ்லியை
கிண்டல் செய்துள்ளளனர். இதனால் ஆத்திரமடைந்த அவர், ரசிகர்களை நோக்கி
நடுவிரலை காட்டியுள்ளார். இது ஐ.சி.சி., விதிமுறைப்படி குற்றம். இவர் மீதான
தவறு நிரூபிக்கப்பட்டால், போட்டி சம்பளத்தில் இருந்து 50 சதவீதம் அபராதம்
அல்லது ஒரு டெஸ்ட் போட்டிக்கு தடை விதிக்கப்படும்.
இது குறித்து
தனது "டுவிட்டர்' இணையதளத்தில் கோஹ்லி வெளியிட்ட செய்தியில்,""தாய்
மற்றும் சகோதரிக்கு எதிராக மிக மோசமான வார்த்தைகளை சிட்னி, ரசிகர்கள்
சொன்னார்கள். ரசிகர்களின் கிண்டலுக்கு கிரிக்கெட் வீரர்கள் பதிலடி
கொடுக்கக் கூடாது என்பதை ஏற்றுக் கொள்கிறேன்,''என, குறிப்பிட்டுள்ளார்.