தனி நாடு போல் செயல்படுகிறது கேரளா: ராமதாஸ் ஆவேசம்

உடுமலை
: "கேரள மாநிலம் தனி நாடு போல் செயல்படுகிறது. தமிழகத்திலிருந்து
கேரளாவுக்கு செல்லும் உணவுப் பொருட்கள் மற்றும் மின்சாரத்தை ஒரு வாரம்
நிறுத்தினாலே, அங்கு எந்த ஆட்சியும் நிலைக்காது' என பா.ம.க., நிறுவனர்
ராமதாஸ் கூறினார்.


அமராவதி அணைக்கு
வரக்கூடிய தண்ணீரை தடுக்கும் வகையில் கேரள அரசு பாம்பாற்றின் குறுக்கே அணை
கட்ட திட்டமிட்டுள்ளது. இதற்கு, எதிர்ப்பு தெரிவித்து, நேற்று பா.ம.க.,
சார்பில் உடுமலையில் ஆர்ப்பாட்டம் நடந்தது. முன்னதாக, ராமதாஸ்
நிருபர்களுக்கு அளித்த பேட்டி: கடந்த 1990ல், காவிரி நடுவர் மன்றம்
அமைக்கப்பட்டு, 17 ஆண்டுகளுக்கு பின், 2007ல் தீர்ப்பு வெளியிடப்பட்டது.
தமிழகம் உட்பட பயன்பெறும் மாநிலங்கள், மேல்முறையீடு செய்துள்ள நிலையில்,
இதற்கான ஆய்வு அமைப்பு ஏற்படுத்தப்படவில்லை. தீர்ப்பு வெளியாகி மூன்று
ஆண்டாகியும், "காவிரி ஒழுங்கு முறை ஆணையம்' அமைக்கப்படவில்லை. இவை
நடைமுறைக்கு வருவதற்கு முன், பாசன பரப்புகள் அதிகரிப்போ, நீர்ப்பிடிப்பு
பகுதிகளில் அணை கட்டுவதோ கூடாது. ஆனால், கேரளா அரசு வழக்கமாக,
சட்டங்களையும், நடைமுறைகளையும் மதிக்காமல் தன்னிச்சையாக பாம்பாற்றின்
குறுக்கே அணை கட்ட முயற்சித்து வருகிறது. இதனால், அமராவதி மூலம்
பயன்பெறும் திருப்பூர் , கரூர் மாவட்டங்களிலுள்ள ஒரு லட்சம் ஏக்கர்
நிலங்கள் பாலைவனமாகும்.


பாம்பாறு
கேரளா எல்லையில் உற்பத்தியானாலும், தமிழக பகுதியில் உற்பத்தியாகும்
காட்டாறுகளிலிருந்துதான் அதிகளவு நீர் பெறுகிறது. இதை தடுக்க தமிழக அரசு
சட்ட ரீதியான நடவடிக்கை எடுக்க வேண்டும். கன்னியாகுமரி மாவட்டத்தில்
நெய்யாறு அணை பிரச்னை, நெல்லை, விருதுநகர், தூத்துக்குடி மாவட்டங்களில்
அச்சன் கோவில் - வைப்பாறு இணைப்பு திட்டம், தேனி, திண்டுக்கல், மதுரை,
சிவகங்கை, ராமநாதபுரம் மாவட்டங்களில் முல்லைப் பெரியாறு பிரச்னை, கோவை,
திருப்பூர், கரூர் மாவட்டங்களில் பாம்பாறு பிரச்னை, ஆழியார்-
பரம்பிக்குளம் நதி நீர் பிரச்னை ஆகியவற்றில் தமிழக அரசுடன் கேரளா
ஒத்துழைப்பதில்லை. வீணாக அரபிக்கடலில் கலந்தாலும், தமிழர்களுக்கு ஒரு
சொட்டு தண்ணீர் தரமாட்டோம் என்ற கொள்கை, கேரளாவில் எந்த ஆட்சி வந்தாலும்
கடைபிடிக்கப்படுகிறது.


தமிழகம்
நீருக்கு மட்டுமே கேரளாவை சார்ந்திருக்கிறது. ஆனால், கேரளா மின்சாரம்,
அரிசி, காய்கறி, பால், பழங்கள், மணல், போக்குவரத்து, வேலைவாய்ப்பு என,
அனைத்துக்கும் தமிழகத்தை நம்பியிருக்கிறது. ஒரு வாரம் கேரளாவுக்கு
பொருட்கள் செல்வதை நிறுத்தினால், கேரளாவில் ஆட்சி கவிழ்ந்து விடும். ஒரு
ஆட்சியும் நிலைக்காது. கேரளா அரசு தனி மாநிலம் போல் இல்லாமல், தனி நாடு
போல் செயல்படுகிறது. தமிழக மக்கள் பொறுமை சாலிகள். ஆனால், பொறுமைக்கும்
எல்லையுண்டு. இவ்வாறு, ராமதாஸ் தெரிவித்தார்.


"தமிழக அரசியலில் ஒற்றுமை இல்லை' :
ஆர்ப்பாட்டத்துக்கு தலைமை வகித்து பா.ம.க., நிறுவனர் ராமதாஸ் பேசியதாவது:
நியாயமாக நமக்கு கிடைக்க வேண்டியவற்றை அண்டை மாநிலங்களான கேரளா, கர்நாடகா,
ஆந்திரா தருவதில்லை. மற்ற மாநிலங்களில், மக்கள் பிரச்னைகளுக்கு அரசியல்
கட்சிகள் ஓரணியில் திரளுகின்றன. தமிழக அரசியல் கட்சிகள் ஒற்றுமையாக இல்லை.
இதனால் தான், நமது உரிமைகளையும், வளத்தையும் நாம் படிப்படியாக இழந்து
வருகிறோம். தமிழக அரசு உறுதியான நடவடிக்கை எடுக்க அனைத்து கட்சி கூட்டத்தை
கூட்ட வேண்டும். தமிழக அரசும், தமிழக மக்களும் கேரளா அரசுக்கு பாடம்
புகட்ட வேண்டும். ஒரு கிலோ அரிசி கூட கேரளாவுக்கு செல்ல அனுமதிக்க கூடாது,
என பேசினார்.


"ஜெய்ராம், கபில் சிபிலை நீக்க வேண்டும்':
உடுமலையில் ராமதாஸ் நிருபர்களுக்கு அளித்த பேட்டியில், "" வனம் மற்றும்
சுற்றுச்சூழல் பிரச்னையில் கவனம் செலுத்தாமல், அமெரிக்க மான்சான்டோ
நிறுவனத்திற்கு ஆதரவாக செயல்படும் மத்திய அமைச்சர் ஜெய்ராம் ரமேஷ்,
மேட்டுக்குடிகளுக்கு மட்டுமே ஆதரவாக உள்ள கபில் சிபல் ஆகியோரை பிரதமர்
அமைச்சரவையிலிருந்து நீக்க வேண்டும். மத்திய அரசின் ஆட்சி, அதிகாரத்தில்
மலையாளிகள் ஆதிக்கம் அதிகளவு உள்ளது. ஆள்வது பெயருக்கு பிரதமராக
இருந்தாலும், ஆட்சி செய்வது மலையாளிகள் தான். முக்கிய செயலர்களாக 19 பேர்
உள்ளனர். இதனால் தான், தமிழகத்துக்கு தீங்கு ஏற்படுகிறது,'' என்றார்.
"தி.மு.க.,வுடன் மீண்டும் கூட்டணி ஏற்படுமா?' என்ற கேள்விக்கு, "" சட்டசபை
தேர்தலின் போது முடிவு செய்து கொள்ளலாம்,'' என்றார்.