கச்சத்தீவை மீட்க நடவடிக்கை: ஜெயலலிதா உறுதி

தூத்துக்குடி/சிவகாசி,
ஏப். 3: அதிமுக ஆட்சி அமைந்தால், கச்சத்தீவை மீட்டு தமிழக மீனவர் நலன்
காக்க நடவடிக்கை எடுக்கப்படும் என ஜெயலலிதா கூறினார்.தூத்துக்குடி
அண்ணாநகர் பிரதான சாலையில் ஞாயிற்றுக்கிழமை நடைபெற்ற பிரசார கூட்டத்தில்,
தூத்துக்குடி, ஸ்ரீவைகுண்டம், திருச்செந்தூர், விளாத்திகுளம், கோவில்பட்டி
ஆகிய தொகுதிகளின் அதிமுக வேட்பாளர்கள் சி.த. செல்லப்பாண்டியன், எஸ்.பி.
சண்முகநாதன், பி.ஆர். மனோகரன், ஜி.வி. மார்க்கண்டேயன், கடம்பூர் செ. ராஜு
மற்றும் ஓட்டப்பிடாரம் தொகுதி புதிய தமிழகம் வேட்பாளர் டாக்டர் க.
கிருஷ்ணசாமி ஆகியோருக்கு வாக்கு கேட்டு வேனில் இருந்தபடி ஜெயலலிதா
பேசியதாவது:திமுக ஆட்சியில் தமிழகம் பின்தங்கிவிட்டது. கடந்த 5 ஆண்டுகளில் தமிழகத்தை ரூ.1 லட்சம் கோடி கடனாளியாக்கிவிட்டார் கருணாநிதி.தமிழகம்
வளர்ச்சியில் பின்னுக்குத் தள்ளப்பட்டுவிட்டது. தமிழக மக்கள் பாடுபட்டு
உழைக்கவில்லையா, சேமித்து வைக்கவில்லையா, சிக்கன வாழ்வை நடத்தவில்லையா,
ஏன் தமிழகம் பின்னுக்குச் சென்றது? இதற்கெல்லாம் கருணாநிதிதான் காரணம்.கச்சத்தீவை
மீட்க நடவடிக்கை: அதிமுக ஆட்சி அமைந்தால் கச்சத்தீவை மீட்டெடுத்து தமிழக
மீனவர் நலன் காக்க நடவடிக்கை எடுக்கப்படும். இயந்திர படகுகள் வாங்க
மானியம் வழங்கப்படும். 13 இடங்களில் மீன் பதப்படுத்தும் பூங்காக்கள்
அமைக்கப்படும். மீன்பிடிக்க விலக்கு அளிக்கப்பட்டுள்ள 45 நாள் தடைக்
காலத்தில் மீனவக் குடும்பங்களுக்கு ரூ. 2000 உதவித்தொகை வழங்கப்படும்.பருவகாலத்தில்
4 மாதங்களுக்கு மீன்பிடித் தொழிலை மேற்கொள்ள இயலாத சூழ்நிலையில் மீனவக்
குடும்பங்களுக்கு ரூ. 4000 உதவித்தொகை வழங்கப்படும்.தமிழ்நாட்டில்
இலங்கை அகதிகள் கெüரவமாக வாழ நடவடிக்கை எடுக்கப்படும். இலவச திட்டங்கள்
இலங்கைத் தமிழ் அகதிகள் முகாம்களுக்கும் நீட்டிக்கப்படும். இலங்கைத்
தமிழர்கள் தங்கள் சொந்த நாட்டில் அடிமைகள் போல் வாழும் நிலையை மாற்ற
மத்திய அரசை வலியுறுத்தி நடவடிக்கை எடுக்கப்படும். அரசு ஊழியர்கள்,
ஆசிரியர்களின் ஊதியக்குழு முரண்பாடுகள் களையப்படும். சத்துணவு ஊழியர்களின்
கோரிக்கைகள் நிறைவேற்றப்படும் என்றார் ஜெயலலிதா.சிவகாசியில்
பிரசாரம்: விருதுநகர் மாவட்டம், சிவகாசியில் அ.தி.மு.க. மற்றும் கூட்டணிக்
கட்சிகளின் வேட்பாளர்களை ஆதரித்து அவர் ஞாயிற்றுக்கிழமை பிரசாரம்
செய்தார். அவர் பேசியதாவது:எந்தப் பொருளை எடுத்தாலும் விலை உயர்வு, மின் வெட்டு, மணல் கொள்ளை, அடிதடி,
கட்டப்பஞ்சாயத்து உள்ளிட்ட சமூக விரோதச் செயல்களைத் தடுக்க இந்தத் தேர்தலை
வாக்காளர்கள் பயன்படுத்திக்கொள்ள வேண்டும். சிவகாசியில் பாதாளச் சாக்கடைத்
திட்டம், பஸ் நிலைய விரிவாக்கம், அரசு மருத்துவமனையை தரம் உயர்த்துதல்
உள்ளிட்ட பணிகளை நாங்கள் செய்வோம். மேலும் இந்த மாவட்டத்தில் உள்ள மற்ற
தொகுதிப் பிரச்னைகள் குறித்தும் எனக்குத் தெரியும்.அ.தி.மு.க.
வெற்றி பெற்றால் தேர்தல் அறிக்கையில் கூறியுள்ள திட்டங்களை
செயல்படுத்துவோம். எனவே இந்தத் தேர்தலில் அ.தி.மு.க. மற்றும் கூட்டணிக்
கட்சி வேட்பாளர்களுக்கு வாக்களியுங்கள்.சிவகாசி தொகுதி அ.தி.மு.க.
வேட்பாளர் கே.டி. ராஜேந்திர பாலாஜி, சாத்தூர் அ.தி.மு.க. வேட்பாளர்
ஆர்.வி. உதயகுமார், அருப்புக்கோட்டை அ.தி.மு.க. வேட்பாளர் வைகைசெல்வன்,
ராஜபாளையம் அ.தி.மு.க. வேட்பாளர் கே. கோபால்சாமி, திருச்சுழி அகில இந்திய
மூவேந்தர் முன்னணிக் கழக வேட்பாளர் இசக்கிமுத்து, ஸ்ரீவில்லிபுத்தூர்
இந்திய கம்யூனிஸ்ட் வேட்பாளர் பொன்னுப்பாண்டி, விருதுநகர் தே.மு.தி.க.
வேட்பாளர் க. பாண்டியராஜன் ஆகியோரையும் அறிமுகம் செய்து வைத்து வாக்கு
சேகரித்தார் ஜெயலலிதா.