மாவோயிஸ்டுகள் சத்திஸ்கரில் மீண்டும் கொலைவெறி :50 பேர் பரிதாப மரணம்

by **ஜனனி** Tue May 18, 2010 7:08 am

ராய்ப்பூர்
: சத்திஸ்கர் மாநிலம் தந்தேவாடா மாவட்டத்தில், மாவோயிஸ்டுகள் மீண்டும்
கொலைவெறி தாக்குதல் நடத்தியுள்ளனர். பஸ் ஒன்றை கண்ணி வெடி மூலம்
தகர்த்ததில், சிறப்பு போலீஸ் அதிகாரிகள், பயணிகள் உட்பட 50 பேர்
பலியாயினர். ஆறு வாரத்திற்குள் நடந்துள்ள இரண்டாவது பெரிய தாக்குதல்
சம்பவம் இது.

சத்திஸ்கர் மாநிலம் தந்தேவாடா மாவட்டத்தில்,
கடந்த ஏப்ரல் 6ம் தேதி நக்சலைட்கள் நடத்திய கொடூர தாக்குதலில், மத்திய
ரிசர்வ் போலீஸ் படையைச் சேர்ந்த 75 பேர் கொல்லப்பட்டனர். இச்சம்பவம் நாடு
முழுவதும் பெரும் அதிர்ச்சியை ஏற்படுத்தியது. இதைத் தொடர்ந்து
சத்திஸ்கரின் பீஜப்பூர் மாவட்டத்தில், நடந்த தாக்குதலில் எட்டு போலீசார்
பலியாயினர்.இந்நிலையில், சத்திஸ்கரின் தந்தேவாடா மாவட்டத்தில், சுக்மா
என்ற இடத்திலிருந்து தந்தேவாடா நோக்கி நேற்று மாலை பயணிகள் பஸ் ஒன்று
சென்று கொண்டிருந்தது. இந்த பஸ்சில் சிறப்பு போலீஸ் அதிகாரிகள் பலரும்
பயணம் செய்தனர்.இவர்கள் பயணித்த பஸ், கேடிராஸ் - பூசரஸ் என்ற இடங்களுக்கு
அருகே சிங்காவரம் கிராமம் அருகே சென்ற போது, நக்சலைட்கள் வைத்த சக்தி
வாய்ந்த கண்ணி வெடியில் சிக்கி வெடித்துச் சிதறியது. தார்ச் சாலைக்கு
அடியில் பதிக்கப்பட்டிருந்த இந்த கண்ணி வெடியை, நக்சலைட்கள் ரிமோட்
கன்ட்ரோல் மூலம் வெடிக்கச் செய்துள்ளனர்.

இந்த பயங்கர தாக்குதலில், சிறப்பு போலீஸ்
அதிகாரிகள், பயணிகள் உட்பட 50 பேர் பலியாயினர். பலர் காயமடைந்தனர். கண்ணி
வெடியில் பஸ் வெடித்துச் சிதறி உருக்குலைந்ததோடு, அதில் பயணித்தவர்களின்
உடல்களும் பல அடி தூரத்திற்கு தூக்கி வீசப்பட்டன.இறந்தவர்கள் பலரின் உடல்
பாகங்கள் பல அடி தூரத்திற்கு சிதறிக் கிடந்தன. சம்பவம் நடந்த இடம்,
சத்திஸ்கர் தலைநகர் ராய்ப்பூரில் இருந்து 450 கி.மீ., தொலைவில் உள்ளது.
மாலை 4.15 மணியளவில் இந்த கொடூர தாக்குதல் நடந்தது.சத்திஸ்கர் உட்பட ஐந்து
மாநிலங்களில் இன்று முதல், 48 மணி நேர 'பந்த்'திற்கு நக்சலைட்கள் அழைப்பு
விடுத்திருந்தனர். அதற்கு முன்னதாக இத்தாக்குதல் நடந்துள்ளது.தாக்குதல்
சம்பவத்திற்கு கடும் கண்டனம் தெரிவித்த மத்திய உள்துறை அமைச்சகம்,
'தாக்குதலில் பலியானவர்களில் பெரும்பாலானவர்கள் அப்பாவிகள். மத்திய
ரிசர்வ் போலீஸ் படையினர் யாரும் தாக்குதலில் பலியாகவில்லை' என்று
கூறியுள்ளது.

சத்திஸ்கரில் ஆட்சியில் உள்ள பாரதிய ஜனதாவும்
தாக்குதலுக்கு கடும் கண்டனம் தெரிவித்துள்ளது. 'மக்களின் ஆதரவை இழந்து
வருவதால், விரக்தி அடைந்த நக்சலைட்கள் இந்த கொடிய தாக்குதலை
நடத்தியுள்ளனர். இது அவர்களின் கோர முகத்தைக் காட்டுகிறது. இவர்களை ஒடுக்க
புதிய உத்தியை மத்திய அரசு எடுக்க வேண்டும். நான் உடனடியாக பிரதமரைச்
சந்தித்து பேசப்போகிறேன்' என, சத்திஸ்கர் முதல்வர் ராமன்சிங் கூறினார்.

மத்திய உள்துறை அமைச்சர் சிதம்பரம் கூறுகையில்,
''இச்செயல் வேண்டுமென்றே நடந்த செயல். இதற்கு கடும் நடவடிக்கை எடுத்தாக
வேண்டும். அப்பாவி மக்கள் பலியாகும் போது அதற்கு அரசு பதில் கூற
கடமைப்பட்டிருக்கிறது. ஈவு இரக்கமின்றி நடத்தப்படும் தாக்குதலை முடிவுக்கு
கொண்டு வந்தாக வேண்டும்,'' என்றார்.

தந்தேவாடா அருகே நக்சலைட்கள் நேற்று நடத்திய
தாக்குதல், இந்த ஆண்டில் அவர்கள் நடத்திய 5வது பெரிய தாக்குதல் என்பதோடு,
அந்த இடத்தில் பரவிய சோகம் மக்களை மிகவும் பாதிப்படைய வைத்தது.வேறு
வழியில்லையேல் விமானத் தாக்குதல் மூலம் நக்சலைட்களை ஒடுக்கலாம் என்ற
கருத்தை பலர் தெரிவித்தனர். நேற்று நடந்த பயங்கர தாக்குதலில், சிறப்பு
போலீசார் எத்தனை பேர் இறந்தனர் என்ற முழு விவரம் தெரியவில்லை.

விடுதலைப் புலிகள் பாணியில் தாக்குதல் :
சத்திஸ்கரில் கண்ணி வெடியை பயன்படுத்தி நக்சலைட்கள் நேற்று தாக்குதல்
நடத்தினர். இதற்காக, சுரங்கம் போன்ற வழியை ஏற்படுத்தி, சாலைக்கு கீழே
வெடிகளை வைத்துள்ளனர். சாலைக்கு மேலிருந்து பார்க்கும் போது குண்டு
வைக்கப்பட்டிருப்பதற்கான அடையாளமே தெரியாத வகையில், அவர்கள் மிகவும்
நேர்த்தியாக இந்த முறையை கையாண்டுள்ளனர்.மேலும், பெரிய அளவில் இழப்பை
ஏற்படுத்தும் வகையில் கண்ணி வெடிகளை, சாலைக்கு கீழே பொருத்தமான இடத்தில்
வைத்துள்ளனர். இதனால் தான் நேற்றைய தாக்குதலில் அதிக உயிர்ப்பலி
ஏற்பட்டுள்ளது.விடுதலைப் புலிகள் அமைப்பைச் சேர்ந்தவர்கள் தான், இலங்கை
ராணுவத்தை முறியடிப்பதற்காக இதுபோன்ற நேர்த்தியான தொழில் நுட்ப ரீதியிலான
தாக்குதலை நடத்துவர். அவர்கள் கையாண்ட முறையை தற்போது நக்சலைட்கள்
கையாண்டுள்ளனர்.