பெரம்பலூர் அருகே தனியார் பஸ்சில் பெட்ரோல் குண்டு வெடிப்பு: 9 பேர் காயம்

பெரம்பலூர், ஆக. 15–

அரியலூர் மாவட்டம் ஜெயங்கொண்டத்தில் இருந்து பெரம்பலூர் வழியாக திருச்சி மாவட்டம் துறையூருக்கு நேற்று இரவு தனியார் பஸ் ஒன்று சென்றது. அதில் சுமார் 40–க்கும் மேற்பட்ட பயணிகள் பயணம் செய்தனர்.

அப்போது ஈச்சம்பட்டி பங்களா பேருந்து நிறுத்தம் அருகே பஸ் சென்றபோது முன்பக்க படிக்கட்டிலிருந்து ‘மர்ம’ பொருள் ஒன்று பயங்கர சத்தத்துடன் வெடித்தது. இதையடுத்து அதிர்ச்சி அடைந்த டிரைவர் பஸ்சை உடனே நிறுத்தினார். பயணிகள் அலறியடித்துக்கொண்டு பஸ்சில் இருந்து இறங்கினர்.

பஸ்சில் பயணம் செய்த திருச்சி மாவட்டம் துறையூர் அருகே உள்ள கோட்டப்பாளையம் கிராமத்தை சேர்ந்த லோகநாதன் (வயது 27), நாகலாபுரத்தை சேர்ந்த தினேஷ் (19), கலியபெருமாள் (35), எரக்குடியை சேர்ந்த விஜயராகவன் (37), நல்லியம் பட்டியை சேர்ந்த துரைசாமி மனைவி ராமாயி (60), பெரம்பலூர் மாவட்டம் களரம்பட்டியை சேர்ந்த கலியன் மனைவி கலைச்செல்வி (30) தேனூரை சேர்ந்த முருகேசன் மனைவி ராஜேஷ்வரி (42) நக்கசேலத்தை சேர்ந்த செல்வராஜ் (50), ரெங்கராஜ் (49) ஆகிய 9 பேர் காயமடைந்தனர்.

சம்பவம் பற்றிய தகவலறிந்த பெரம்பலூர் போலீசார் சம்பவ இடத்துக்கு விரைந்து சென்று காயமடைந்தவர்களை மீட்டு பெரம்பலூர் அரசு மருத்துவமனைக்கு அனுப்பி வைத்தனர்.

மாவட்ட காவல் கண்காணிப்பாளர் சோனல் சந்த்ரா, துணை கண்காணிப்பாளர் சுருளியாண்டி மற்றும் போலீசார் விரைந்து சென்று சம்பவ இடத்தை பார்வையிட்டபோது பஸ் படிக்கட்டின் இடது புறம் உள்ள பயணிகள் இருக்கையின் பின் பகுதியில் ஒரு பையில் 2 லிட்டர் பிளாஸ்டிக் பாட்டிலில் பெட்ரோலை நிரப்பி பேட்டரி உள்ளிட்ட பொருட்கள் இணைத்து வைக்கப்பட்டு இருந்தது கண்டறியப்பட்டது. தடயவியல் மற்றும் கைரேகை நிபுணர்கள் கைரேகை தடயங்களை சேகரித்தனர்.

இதுகுறித்து பெரம்பலூர் போலீசார் வழக்குப்பதிவு செய்து விசாரணை நடத்தி வருகின்றனர். சுதந்திர தின விழா இன்று கொண்டாடப்படும் வேளையில் பேருந்தில் பெட்ரோல் குண்டு வெடித்தது பெரம்பலூர் பகுதியில் பெரும் பரபரப்பை ஏற்படுத்தி உள்ளது.

பஸ்சில் பெட்ரோல் குண்டை எடுத்து சென்று வேறு இடத்தில் வெடிக்க பயன்படுத்த எடுத்து சென்றதா அல்லது பேருந்தில் ரிமோட் மூலம் வெடிக்கப்பட்டதா? பேருந்தில் பயணம் செய்தவர்கள் யார்–யார்? அவர்கள் எந்த ஊரை சேர்ந்தவர்கள் என்றும் எந்த எந்த ஊரில் யார் யார் ? இறங்கினார்கள், என்றும் தீவிரமாக விசாரணை நடத்தப்பட்டு வருகிறது.