பனிமலையில் போர் மேகம்:

நேற்று இந்தியா போர் விமானம் தரையிறக்கப்பட்ட இடம் காஷ்மீர் மாநிலத்தின் லடாக் பகுதியில் உள்ளது தவுலத் பெக் ஓல்டி . இது இந்திய - சீன எல்லைப்பகுதியில் லடாக் மற்றும் சீனாவின் கட்டுப்பாட்டில் உள்ள அக்சய் சீனா ஆகியவற்றுக்கு இடையே உள்ளது. இந்த இடத்தில் தான், 3 மாதங்களுக்கு முன், சீன ராணுவம் 19 கி.மீ., ஊடுருவியது. பல்வேறு பேச்சுவார்த்தைகளுக்குப்பின், சீனா ராணுவம் பின் வாங்கியது. இதன் பின்னும், அருணாச்சல், சிக்கிம் மற்றும் லடாக் ஆகிய பகுதிகளில் அவ்வப்போது சீன ராணுவம் ஊடுருவுகிறது. இதற்கு பதிலடி கொடுக்கும் விதமாக நேற்று காலை 6.54 மணிக்கு இந்திய விமானப்படையின் முக்கிய போர் விமானமான "இ-130ஒ சூப்பர் ஹெர்குலஸ்', தவுலத் பகுதியில் நிலை நிறுத்தப்பட்டுள்ளது. இது சீனாவின் அடாவடித்தனத்துக்கு, இந்தியா எடுத்த முதல் பதிலடியாக பார்க்கப்படுகிறது. தவுலத் பெக் ஓல்டி பகுதியில், இந்திய ராணுவ முகாம் செயல்படுகிறது. இங்கு விமான ஓடுதளமும் உள்ளது. கடல் மட்டத்தில் இருந்து இதன் உயரம் 16,614 அடி. இது தான் உலகின் மிக உயரமான இடத்தில் உள்ள ஓடுதளம். 1962ல் சீனாவுடன் ஏற்பட்ட போரின் போது, இங்கு போர் விமானங்கள் தரையிறங்கியன; போரிலும் ஈடுபட்டன. 1965 வரை இங்கு போர் விமானங்கள் பணியில் இருந்தன.இந்த ஓடுதளத்தில் பராமரிப்பு பணிகள் மேற்கொள்ளப்பட்டு, 2008ம் ஆண்டு மீண்டும் பயன்பாட்டுக்கு கொண்டுவரப்பட்டது. இந்நிலையில் 48 ஆண்டுகளுக்குப் பின், நேற்று இந்தியாவின் பெரிய போர் விமானங்களில், ஒன்றான "இ-130ஒ சூப்பர் ஹெர்குலஸ்' இங்கு தரையிறக்கப்பட்டுள்ளது. இதையடுத்து இந்திய - சீன எல்லையில் போர் பதற்றம் ஏற்பட்டுள்ளது.



"சூப்பர்' ஹெர்குலஸ் :



ஹெர்குலஸ் வகை போர் விமானம் அமெரிக்காவின் ராணுவ பயன்பாட்டுக்காக தயாரிக்கப்பட்டது. 2008ல் இந்திய விமானப்படை, ஆறு விமானங்களை வாங்கியது.இதை குறைந்தது மூன்று பேர் கொண்ட பைலட் குழுவால் மட்டுமே இயக்க முடியும். 92 ராணுவ வீரர்களை, ஆயுதங்களுடன் ஏற்றிக்கொண்டு பறக்கும் ஆற்றலுடையது. விமானத்தின் சாதாரண எடை 34,274 கிலோ. 33 ஆயிரம் கிலோ போர் தளவாடங்களை ஏற்றலாம். மொத்தம் 79,378 கிலோ எடையுடன் விண்ணில் பறக்கும். ஹெர்குலஸ் வகை விமானம், விண்ணிலேயே எரிபொருள் நிரப்பிக் கொள்ளும் திறன் பெற்றது. ஒருமுறை எரிபொருள் நிரப்பினால் 5,250 கி.மீ., தூரம் பயணிக்கும். விமானம் மேலெழும்ப 953 மீட்டர் ஓடுபாதை தேவை.
வேகம்: மணிக்கு 671 கி.மீ.,
பறக்கும் உயரம்: 40,386 அடி
விமானத்தின் நீளம்: 97 அடி 9 இன்ச்
இறக்கையின் நீளம்: 132 அடி 7 இன்ச்
இறக்கை பரப்பளவு: 1,745 சதுர அடி
உயரம்: 38 அடி 10 இன்ச்