சத்துணவு பணியாளர் நியமனம் செல்லாது: மதுரை உயர்நீதிமன்றம் தீர்ப்பு

மதுரை, அக்.2- உள்ளூரை சேர்ந்தவர்களுக்கு முன்னுரிமை என்ற அடிப்படையில் நியமனம் செய்யப்பட்ட 28 ஆயிரத்து 596 சத்துணவு பணியாளர் நியமனம் செல்லாது என்று மதுரை உயர்நீதிமன்றம் தீர்ப்பு கூறி உள்ளது.

தமிழகம் முழுவதும் காலியாக இருந்த 28 ஆயிரத்து 596 சத்துணவு, அங்கன்வாடி பணியாளர் பணியிடங்களையும் நிரப்ப 30.4.2012 அன்று தமிழக அரசு உத்தரவிட்டது. அதன்படி காலி பணியிடங்கள் உள்ள கிராமத்தை சேர்ந்தவர்களிடம் இருந்து விண்ணப்பங்களை பெற்று அந்தந்த மாவட்ட ஆட்சியர்கள் சத்துணவு பணியாளர்கள், அங்கன்வாடி பணியாளர்களை நியமித்தனர். உள்ளூரை சேர்ந்தவர்களுக்கு முன்னுரிமை என்ற அரசாணை அடிப்படையில் இந்த பணி நியமன நடவடிக்கைகள் மேற்கொள்ளப்பட்டது.

இந்த நிலையில் சத்துணவு, அங்கன்வாடி பணியாளர்கள் நியமனத்தில் உள்ளூரை சேர்ந்தவர்களுக்கு முன்னுரிமை அளிக்கப்படவில்லை; நேர்முக தேர்வுக்கு கடிதம் அனுப்பவில்லை; நேர்முக தேர்வில் கலந்து கொண்ட போதும் பணி நியமன உத்தரவு வழங்கவில்லை; வயது வரம்பில் விலக்கு அளிக்க வேண்டும் என்பன போன்ற புகாரின் பேரில் 30-க்கும் மேற்பட்டவர்கள் மதுரை உயர்நீதிமன்றக் கிளையில் மனு தாக்கல் செய்தனர்.

இந்த மனுக்கள் அனைத்தும் நீதிபதி வினோத்குமார் சர்மா முன்னிலையில் விசாரணைக்கு வந்தது. மனுதாரர்கள் சார்பில் வழக்கறிஞர்கள் தினேஷ்பாபு, ஆர்.வெங்கடேசன், சஞ்சய்காந்தி ஆகியோர் ஆஜராகி வாதாடினர். மனுவை விசாரித்த நீதிபதி தீர்ப்பில் கூறி இருப்பதாவது:-

உள்ளூரை சேர்ந்தவர்களுக்கு முன்னுரிமை என்ற அடிப்படையில் சத்துணவு, அங்கன்வாடி பணியாளர்களை தேர்வு செய்தது சட்டத்துக்கு புறம்பானது. ஒருவர் வசிக்கும் இருப்பிடத்தை அடிப்படையாக வைத்து அவருக்கு வேலை தர முடியாது என்று கூற முடியாது. எனவே சத்துணவு, அங்கன்வாடி பணியாளர்கள் நியமனத்தில் உள்ளூரை சேர்ந்தவர்களுக்கு முன்னுரிமை என்ற அரசாணை செல்லாது. உள்ளூரை சேர்ந்தவர்களுக்கு முன்னுரிமை என்ற அடிப்படையில் நியமிக்கப்பட்ட 17 ஆயிரத்து 65 சத்துணவு, அங்கன்வாடி பணியாளர் நியமனமும் செல்லாது.

இந்த பணியிடங்களை பொறுத்தமட்டில் எல்லோரும் போட்டியில் கலந்து கொள்ள வாய்ப்பு மறுக்கப்பட்டுள்ளது. விதவை, கணவரால் கைவிடப்பட்டவர்களுக்கு முன்னுரிமை, சிறுபான்மை இனத்தை சேர்ந்த கிறிஸ்தவர், முஸ்லிம்களுக்கு இடஒதுக்கீடு, ஊனமுற்றவர்களுக்கு இடஒதுக்கீடு என்று பல்வேறு அரசாணைகள் இருந்த போதிலும் இந்த அரசாணைகளில் கூறப்பட்டுள்ள வழிகாட்டுதல்களும், விதிகளும் சத்துணவு, அங்கன்வாடி பணியாளர்கள் நியமனத்தில் முறையாக பின்பற்றப்படவில்லை.

எனவே மாவட்ட நிருவாகம், அனைத்து அரசாணைகளையும் ஒருங்கிணைத்து மொத்தம் காலியாக உள்ள பணியிடங்கள் எத்தனை? அதில் பிற்படுத்தப்பட்டோர், மிகவும் பிற்படுத்தப்பட்டோர், தாழ்த்தப்பட்டோர், ஊனமுற்றோர், விதவை, கணவரால் கைவிடப்பட்டவர்கள், சிறுபான்மையினத்தை சேர்ந்தவர்களுக்கான ஒதுக்கீடு குறித்து அறிவிப்பு வெளியிட வேண்டும். அதன்பின்பு தகுதியான நபர்களிடம் இருந்து விண்ணப்பங்களை பெற்று தேர்வு கமிட்டி மூலம் இடஒதுக்கீடு அடிப்படையில் தகுதியான நபர்களை தேர்வு செய்ய வேண்டும்.

ஒரு கிராமத்தில் 2-க்கும் மேற்பட்டவர்கள் தகுதியானவர்களாக இருந்தால், இன்னொரு நபரை பக்கத்து கிராமத்தில் நியமிக்கலாம். இந்த பணி நியமனம் தொடர்பான பணிகளை 2 மாதத்துக்குள் முடிக்க வேண்டும்.

இவ்வாறு தீர்ப்பில் கூறப்பட்டுள்ளது.
[img][/img]