தோனி சதம் : இந்தியா வெற்றி : வங்கதேசம் பரிதாபம்

மிர்புர்
: முத்தரப்பு லீக் போட்டியில் "சூப்பராக' ஆடிய கேப்டன் தோனி சதம் விளாச,
இந்திய அணி, வங்கதேசத்தை 6 விக்கெட் வித்தியாசத்தில் விழ்த்தியது. இளம்
விராத் கோஹ்லி, சுரேஷ் ரெய்னாவின் துடிப்பான ஆட்டமும் இந்திய வெற்றிக்கு
பக்கபலமாக அமைந்தது.


வங்கதேசத்தில்
முத்தரப்பு ஒரு நாள் கிரிக்கெட் தொடர் நடக்கிறது. இந்திய அணி தனது முதல்
போட்டியில் இலங்கையிடம் தோல்வி அடைந்தது. நேற்று மிர்புரில் நடந்த மிக
முக்கியமான லீக் போட்டியில்(பகலிரவு) இந்திய அணி, வங்கதேசத்தை
எதிர்கொண்டது. இந்திய அணியில் மாற்றம் எதுவும் செய்யப்படவில்லை. டாஸ்
வென்ற வங்கதேச கேப்டன் சகிப் அல் ஹசன், பேட்டிங் தேர்வு செய்தார்.


இக்பால் அதிரடி:
வங்கதேச அணிக்கு தமிம் இக்பால், இம்ருல் கெய்ஸ் இணைந்து சூப்பர் துவக்கம்
தந்தனர். அதிரடியாக ஆடிய தமிம் இக்பால், இந்திய "வேகங்களை' ஒருகை
பார்த்தார். நெஹ்ரா பந்தில் ஒரு இமாலய சிக்சர் அடித்த இவர், ஸ்ரீசாந்த்,
ஜாகிர் பந்துவீச்சில் பவுண்டரிகளாக விளாசினார். ஒரு நாள் அரங்கில் 12வது
அரைசதம் கடந்த இக்பால் 60 ரன்களுக்கு(10 பவுண்டரி, 1 சிக்சர்), ஸ்ரீசாந்த்
பந்தில் வெளியேறினார். ரவிந்திர ஜடேஜா சுழலில் அஷ்ரபுல்(29) சிக்கினார்.
ஜாகிரின் நேரடி "த்ரோவில்' கேப்டன் சகிப் அல் ஹசன்(0) ரன் அவுட்டானார்.
அபார ஆட்டத்தை தொடர்ந்த இம்ருல் கெய்ஸ் 70 ரன்களுக்கு நெஹ்ரா பந்தில்
அவுட்டானார். முஷ்பிகுர் ரஹிம்(6) ஏமாற்றினார்.


10 ஓவரில் 88 ரன்: பின்னர்
ரகிபுல் ஹசன், மகமதுல்லா இணைந்து பொறுப்பாக ஆடினர். ரகிபுல் 32 ரன்கள்
எடுத்தார். கடைசி கட்டத்தில் மகமதுல்லா, நயீம் இஸ்லாம் சேர்ந்து அதிரடியாக
ரன் சேர்த்தனர். பேட்டிங் "பவர் பிளேயை' அருமையாக பயன்படுத்திய இவர்கள்
ரன் மழை பொழிய, கடைசி 10 ஓவர்களில் 88 ரன்கள் எடுக்கப்பட்டன. வங்கதேச அணி
50 ஓவரில் 6 விக்கெட்டுக்கு 296 ரன்கள் எடுத்தது. மகமதுல்லா 60(8
பவுண்டரி), நயீம் 14 ரன்களுடன் அவுட்டாகாமல் இருந்தனர்.


விக்கெட் மடமட:
சவாலான இலக்கை விரட்டிய இந்திய அணி மோசமான துவக்கம் கண்டது. ஒரு
ரன்னுக்காக வீணாக ஓடிய சேவக்(13), அப்துர் ரசாக்கின் துல்லிய "த்ரோவில்'
பரிதாபமாக ரன் அவுட்டானார். இந்த அதிர்ச்சியில் இருந்து மீள்வதற்குள்
ருபல் ஹூசைன் பந்தில் காம்பிர் (18) போல்டானார். அடுத்து வந்த யுவராஜ்(1),
சயத் ரேசல் பந்தில் போல்டாக, இந்திய அணி 8.1 ஓவரில் 3 விக்கெட் டுக்கு 51
ரன்கள் எடுத்து திணறியது.


கோஹ்லி அபாரம்: இதற்கு
பின் கேப்டன் தோனி, விராத் கோஹ்லி இணைந்து விவேகமாக ஆடினர். அதிக "ரிஸ்க்'
எடுக்காமல் பேட் செய்த இவர்கள், மேலும் விக்கெட் விழாமல் பார்த்துக்
கொண்டனர். அசத்தலாக விளையாடிய 21 வயது இளம் கோஹ்லி, ஒரு நாள் போட்டிகளில்
தனது நான்காவது அரைசதம் கடந்தார். தசைப்பிடிப்பால் இவர் அவதிப்பட,
"ரன்னராக' காம்பிர் செயல்பட்டார். சிறிது நேரத்தில் சகிப் அல் ஹசன்
பந்தில் கோஹ்லி சிக்கினார். இவர் 91 ரன்கள்(7 பவுண்டரி) எடுத்து மீண்டும்
திறமை நிரூபித்தார். தோனி-கோஹ்லி 4வது விக்கெட் டுக்கு 152 ரன்கள்
சேர்த்தனர்.


தோனி சதம்:
அடுத்து வந்த ரெய்னா "கம்பெனி' கொடுக்க, தோனி தனது அபார ஆட்டத்தை
தொடர்ந்தார். சயத் ரேசல் பந்தில் ஒரு பவுண்டரி அடித்த தோனி, ஒரு நாள்
அரங்கில் தனது 7வது சதம் எட்டினார். தன் பங்குக்கு ஒரு பவுண்டரி அடித்த
ரெய்னா, தனது 14வது அரைதம் கடந்தார். இந்திய அணி 47.3 ஓவரில் 4
விக்கெட்டுக்கு 297 ரன்கள் எடுத்து அசத்தல் வெற்றி பெற்றது. தோனி 101(9
பவுண்டரி), ரெய்னா 51(5 பவுண்டரி, 1 சிக்சர்) அவுட்டாகாமல் இருந் தனர்.
ஆட்ட நாயகன் விருதை தோனி தட்டிச் சென்றார்.


இது அதிகம்:
நேற்று 296/6 ரன்கள் எடுத்த வங்கதேச அணி, இந்தியாவுக்கு எதிராக தனது
அதிகபட்ச ஸ்கோரை பெற்றது. முன்னதாக 2008ல் கராச்சியில் நடந்த போட்டியில்
283/6 ரன்கள் எடுத்திருந்தது. தவிர, டெஸ்ட் அந்தஸ்து பெற்ற அணிகளுக்கு
எதிராக தனது அதிகபட்ச ஸ்கோரையும் பதிவு செய்தது. இதற்கு முன் 2008ல்
பாகிஸ்தானுக்கு எதிராக 285/7 ரன்கள் எடுத்திருந்தது.


இக்பால்-ஜாகிர் மோதல்:
ஏழாவது ஓவரில் ஒரு ரன் எடுக்க ஓடி வந்த தமிம் இக்பால் மற்றும் ஜாகிர் கான்
எதிர்பாராதவிதமாக மோதிக் கொண்டனர். இதையடுத்து இக்பால் ஏதோ சொல்ல, பதட்டம்
ஏற்பட்டது. பின்னர் அம்பயர் தலையிட்டு சமாதானம் செய்து வைத்தார்.


*
அதிரடியாக ஆடிய தமிம் இக்பால் 33 பந்து களில் 50 ரன்கள் எடுத்தார். இதன்
மூலம் இந்தியாவுக்கு எதிராக அதிவேக அரைசதம் அடித்த வங்கதேச வீரர் என்ற
பெருமை பெற்றார்.


பீல்டிங் சொதப்பல்:
இந்திய வீரர்கள் மீண்டும் ஒரு முறை பீல்டிங்கில் சொதப்பினர். நெஹ்ரா
ஓவரில் இம்ருல் கெய்ஸ் கொடுத்த சுலப "கேட்ச்' வாய்ப்பை முதலில் ஹர்பஜன்
கோட்டை விட்டார். அப்போது அவர் 3 ரன்கள் தான் எடுத்திருந்தார். பின்னர் 67
ரன்கள் எடுத்திருந்த போது கேப்டன் தோனியின் கைநழுவியது. இதனை பயன்படுத்திய
கெய்ஸ் 70 ரன்கள் எடுத்தார். பந்தை துடிப்பாக பீல்டிங் செய்யவும்
நம்மவர்கள் தவறினர். நெஹ்ரா உள்ளிட்டோர் சரியாக தடுக்காததால் பந்து பல
முறை பவுண்டரிக்கு பறந்தது.


இனி 1.30 மணிக்கு:
முத்தரப்பு தொடரில் பனிப்பொழிவு பாதிப்பை ஏற்படுத்துவதால் போட்டிகளை
முன்னதாக துவக்க வேண்டுமென இந்திய கேப்டன் தோனி, இலங்கை கேப்டன் சங்ககரா
வலியுறுத்தினர். இதனை வங்கதேச கிரிக்கெட் போர்டு ஏற்றுக் கொண்டு உள்ளது.
இனி போட்டிகள் அரைமணி நேரம் முன்னதாக துவங்கும். பிற்பகல் 2 மணிக்கு
பதிலாக 1.30 மணிக்கு ஆட்டம் துவங்கும்.


உதிரி மழை:
நேற்று இந்திய பவுலர்கள் படுமோசமாக செயல்பட்டனர். ரன்களை வாரி வழங்கிய
இவர்கள், 25 உதிரிகளையும் விட்டுக் கொடுத்தனர். நெஹ்ரா, ஸ்ரீசாந்த்
ஆகியோர் "நோ-பால்' வீச.... "பிரி-ஹிட்' மூலம் வங்கதேச வீரர்கள் சிக்சர்கள்
அடிக்க, இந்திய ரசிகர்கள் நொந்து போயினர்.