புதிய தலைமைச் செயலகத்தை சுற்றியுள்ள ஓட்டல், மேன்ஷன்களுக்கு கட்டுப்பாடுகள்

சென்னை
: "புதிய தலைமைச் செயலக வளாகத்தைச் சுற்றியுள்ள ஓட்டல்கள், மேன்ஷன்களில்
தங்க வருபவர்களை முழுமையாக விசாரித்த பிறகே அறை வழங்க வேண்டும்; அவர்களது
விவரங்களை போலீஸ் நிலையங்களுக்கு வழங்க வேண்டும்; "சிசிடிவி' கேமரா
கண்டிப்பாக பொருத்த வேண்டும்' என, பல்வேறு கட்டுப்பாடுகள்
விதிக்கப்பட்டுள்ளன.
சென்னை, அண்ணாசாலையில் புதிய தலைமைச் செயலக வளாகம்
கட்டப்படுகிறது. இதையடுத்து, அப்பகுதியில் பாதுகாப்பு முன்னேற்பாடுகளில்
போலீசார் அதிக கவனம் செலுத்தி வருகின்றனர். புதிய தலைமைச் செயலக
வளாகத்தில் நவீன பாதுகாப்பு வசதிகளுக்காக பல கோடி ரூபாய் செலவிடப்படுகிறது.
புதிய
தலைமைச் செயலக வளாகத்தை பிரதமர் மன்மோகன் சிங், காங்கிரஸ் தலைவர் சோனியா
ஆகியோர் அடுத்த மாதம் 13ம் தேதி திறக்கவுள்ள நிலையில், வளாகத்தை
சுற்றியுள்ள பகுதிகளிலும் பாதுகாப்பு குறித்து போலீசார் அதிக அக்கறை
எடுக்க துவங்கியுள்ளனர். புதிய தலைமைச் செயலக வளாகத்தைச் சுற்றியுள்ள
திருவல்லிக்கேணி, எழும்பூர், நுங்கம்பாக்கம் பகுதிகளில் அதிகளவில்
ஓட்டல்கள் மற்றும் மேன்ஷன்கள் உள்ளன.
இப்பகுதி மேன்ஷன்வாசிகளின்
சொர்க்கபுரி என்றும் அழைக்கப்படுகிறது. திருவல்லிக்கேணியில் 250,
நுங்கம்பாக்கத்தில் 150, எழும்பூரில் 100 ஓட்டல்கள் மற்றும் மேன்ஷன்கள்
உள்ளன. இந்த ஓட்டல் மற்றும் மேன்ஷன் உரிமையாளர்கள் கூட்டத்தை, இரு
தினங்களுக்கு முன் போலீசார் நடத்தினர்.
ஓட்டல், மேன்ஷன்களில் மேற்கொள்ள
வேண்டிய பாதுகாப்பு முன்னேற்பாடுகள் குறித்து நடந்த இக்கூட்டத்தில் மத்திய
சென்னை போலீஸ் இணை கமிஷனர் ரவிகுமார், திருவல்லிக்கேணி துணை கமிஷனர்
அன்பு, உதவி கமிஷனர் தமிழ்செல்வன் ஆகியோர் கலந்து கொண்டனர். புதிய தலைமைச்
செயலக பாதுகாப்பை முன்னிட்டு, ஓட்டல் மற்றும் மேன்ஷன்களில் மேற்கொள்ள
வேண்டிய பாதுகாப்பு ஏற்பாடுகள் குறித்து அப்போது உரிமையாளர்களிடம்
தெரிவிக்கப்பட்டது.
அதன் விவரம்: ஓட்டல், மேன்ஷன்களில் தினசரி யார்
தங்குகிறார்கள் என்ற விவரத்தை முழுமையாக குறித்து வைக்க வேண்டும். தங்க
வருபவர்களிடம் பெயர், முகவரி, தொலைபேசி எண்களை கேட்க வேண்டும். வெளிநாட்டு
பயணிகள் யாராவது தங்க வந்தால், அவர்களது பாஸ்போர்ட், விசாவை சோதித்த
பிறகே, அறை வழங்க வேண்டும். மேலும், அவர்கள் தங்குவது குறித்து போலீஸ்
நிலையத்திற்கும் தகவல் தர வேண்டும்.
மேன்ஷன்களில் தங்கியிருப்பவர்கள்
விவரங்களை மாதம்தோறும், சம்பந்தப்பட்ட போலீஸ் நிலையத்தில் ஒப்படைக்க
வேண்டும். அறையை காலி செய்பவர்கள் மற்றும் அந்த அறையில் புதிதாக
தங்குபவர்கள் விவரத்தை உடனடியாக போலீஸ் நிலையத்தில் வழங்க வேண்டும்.
ஓட்டல், மேன்ஷன்களின் வரவேற்பறையிலும், ஒவ்வொரு தளத்திலும் "சிசிடிவி'
கேமராக்களை கண்டிப்பாக பொருத்த வேண்டும்.
அனைத்து ஓட்டல் மற்றும்
மேன்ஷன்களிலும் பாதுகாப்பிற்கு செக்யூரிட்டியை நியமிக்க வேண்டும்.
வரவேற்பாளர் மற்றும் ரூம் பையன்கள் பணிக்கு, நல்ல நபர்களாக தேர்ந்தெடுத்து
நியமிக்க வேண்டும். அவர்களது விவரங்களையும் போலீசாருக்கு தெரிவிக்க
வேண்டும். மேன்ஷனில் புதிதாக தங்க வருபவர்களிடம், அவர்களது உறவினர்களின்
விவரத்தை பெற்று, விசாரித்த பிறகே அறை வழங்க வேண்டும்.
அறைகளில்
தங்குபவர்கள் யாராவது அதிகளவில் பணம் வைத்திருந்தால், உறவினர் அல்லாத
பெண்களுடன் தங்குவதாக தெரிந்தால் போலீசாருக்கு தகவல் கொடுக்க வேண்டும்.
ஓட்டல், மேன்ஷனில் திருட்டு, அடிதடி உள்ளிட்ட எந்த சம்பவம் நடந்தாலும்
உடனடியாக போலீசாருக்கு தகவல் தர வேண்டும். வரும் மார்ச் மாதத்திலிருந்து
இக்கட்டுப்பாடுகளை கடுமையாக பின்பற்ற வேண்டும். இவ்வாறு ஓட்டல், மேன்ஷன்
உரிமையாளர்களிடம் போலீசார் தெரிவித்தனர்.
இதை தொடர்ந்து, புதிய தலைமைச்
செயலகத்தை சுற்றியுள்ள ஓட்டல்கள் மற்றும் மேன்ஷன்களை தொடர்ந்து தீவிரமாக
கண்காணிக்கவும் போலீசார் திட்டமிட்டுள்ளனர்