இந்திய அணிக்கு கடின இலக்கு * இயான் பெல் அபார சதம்* வலுவான நிலையில் இங்கிலாந்து

நாட்டிங்காம்:
நாட்டிங்காம் டெஸ்டில் இந்திய அணிக்கு கடின இலக்கு காத்திருக்கிறது. இயான்
பெல் அசத்தல் சதம் அடிக்க, இங்கிலாந்து அணி வலுவான முன்னிலை நோக்கி
முன்னேறுகிறது. இந்திய பவுலர்கள் விரைவாக விக்கெட் வீழ்த்த முடியாமல்
திணறினர்.
இங்கிலாந்து சென்றுள்ள இந்திய அணி, நான்கு டெஸ்ட் போட்டிகள்
கொண்ட தொடரில் பங்கேற்கிறது. முதல் டெஸ்டில் வென்ற இங்கிலாந்து அணி,
தொடரில் 1-0 என்ற முன்னிலையில் உள்ளது. இரண்டாவது டெஸ்ட் போட்டி,
நாட்டிங்காமில் நடக்கிறது. முதல் இன்னிங்சில் இங்கிலாந்து 221, இந்தியா 288
ரன்கள் எடுத்தன. இரண்டாம் நாள் ஆட்டநேர முடிவில் இங்கிலாந்து அணி,
இரண்டாவது இன்னிங்சில் ஒரு விக்கெட்டுக்கு 24 ரன்கள் எடுத்திருந்தது.
நேற்று
மூன்றாவது நாள் ஆட்டம் நடந்தது. ஸ்ரீசாந்த் வேகத்தில் கேப்டன்
ஸ்டிராஸ்(16) அவுட்டானார். இதற்கு பின் இயான் பெல், கெவின் பீட்டர்சன்
இணைந்து பொறுப்பாக பேட் செய்தனர். இந்திய பந்துவீச்சை சிதறடித்த இவர்கள்,
மிக விரைவாக ரன் சேர்த்தனர். டெஸ்ட் போட்டிகளில் பீட்டர்சன் தனது 24வது
அரைசதம் கடந்தார். மறுபக்கம் ஸ்ரீசாந்த் பந்தை 2 ரன்களுக்கு தட்டி விட்ட
பெல், டெஸ்ட் அரங்கில் தனது 15வது சதம் அடித்தார். இது இந்தியாவுக்கு
எதிராக இவர் அடிக்கும் முதலாவது சதமாக அமைந்தது. இந்த நேரத்தில் ஸ்ரீசாந்த்
பந்தில் பீட்டர்சன்(63) வெளியேற, இந்திய வீரர்கள் நிம்மதி அடைந்தனர்.
மார்கன் அதிரடி:
அடுத்து
வந்த இயான் மார்கன் "கம்பெனி கொடுக்க, தனது அபார ஆட்டத்தை தொடர்ந்தார்
இயான் பெல். 137 ரன்களில் சர்ச்சைக்குரிய ரன் அவுட் வாய்ப்பில் இருந்து
தப்பிய பெல்(159) ஒருவழியாக யுவராஜ் சுழலில் சிக்கினார். அதிரடியாக ஆடிய
மார்கன் பவுண்டரி மழை பொழிந்தார். ஹர்பஜன் பந்தில் ஒரு சிக்சர் அடித்த
இவர், இங்கிலாந்தின் ஸ்கோரை விரைவாக உயர்த்தினார். அரைசதம் கடந்த
மார்கன்(70), பிரவீண் குமார் வேகத்தில் வீழ்ந்தார். டிராட்(2) ஏமாற்றினார்.
கடைசி
கட்டத்தில் மாட் பிரையர், டிம் பிரஸ்னன் இணைந்து அசத்தலாக ஆடினர். ஆட்ட
நேர முடிவில் இங்கிலாந்து அணி தனது இரண்டாவது இன்னிங்சில் 6 விக்கெட்டுக்கு
441 ரன்கள் எடுத்திருந்தது. இதன் மூலம் 374 ரன்கள் முன்னிலை பெற்று வலுவான
நிலையில் இருந்தது. அரைசதம் கடந்த பிரையர்(64), பிரஸ்னன்(47) அவுட்டாகாமல்
இருந்தனர்.
இன்று மேலும் ரன்களை சேர்த்து இந்தியாவுக்கு கடின இலக்கை
இங்கிலாந்து நிர்ணயிக்கும். இன்னும் இரண்டு நாட்கள் ஆட்டம் மீதமிருப்பதால்,
இந்திய பேட்ஸ்மேன்களுக்கு கடின சவால் காத்திருக்கிறது.



பெல் "ரன் அவுட் சர்ச்சை
விளையாட்டு
உணர்வுடன் நடந்து கொண்ட இந்திய கேப்டன் தோனி, இங்கிலாந்து வீரர் இயான்
பெல்லுக்கு எதிரான "ரன் அவுட்டை வாபஸ் பெற்று, ரசிகர்களின் இதயங்களை
கவர்ந்தார்.
நேற்றைய இரண்டாவது இன்னிங்சின் 66வது ஓவரை இஷாந்த் சர்மா
வீசினார். பந்தை மார்கன் அடித்தார். இதனை எல்லைக் கோட்டு அருகே
தட்டுத்தடுமாறி தடுத்த பிரவீண் குமார், தோனி வசம் எறிந்தார். இதற்குள்
மூன்றாவது ரன்னை ஓடி முடித்த இயான் பெல், பந்து பவுண்டரிக்கு சென்று
விட்டதாக நினைத்தார். தவிர, அம்பயர் தேநீர் இடைவேளை அறிவித்து விட்டதாக
எண்ணி, மறுமுனை நோக்கி மெதுவாக நடந்து வந்தார். இந்த நேரத்தில் பந்தை
முகுந்த் வசம் கொடுத்தார் தோனி. முகுந்ந் "பெயில்சை தகர்க்க, இந்திய
வீரர்கள் "ரன் அவுட் கோரினர். உடனே மூன்றாவது அம்பயரிடம் கேட்கப்பட்டது.
அவரும் "அவுட் கொடுத்தார். தேநீர் இடைவேளை என நினைத்து தான் நடந்து வந்ததாக
பெல் வாதிட்டும் பலன் கிடைக்கவில்லை. 137 ரன்களுக்கு வெளியேற நேர்ந்தது.
இதனால் ஆத்திரமடைந்த இங்கிலாந்து ரசிகர்கள், இந்திய வீரர்களை நோக்கி
கூச்சலிட்டனர்.
பின் தேநீர் இடைவேளையின் போது இந்திய அணியின் "டிரஸ்சிங்
ரூமிற்கு இங்கிலாந்து கேப்டன் ஸ்டிராஸ் மற்றும் பயிற்சியாளர் ஆண்டி பிளவர்
சென்றுள்ளனர். "பெல்லுக்கு எதிரான "ரன் அவுட்டை திரும்ப பெற
விரும்புகிறீர்களா? என தோனியிடம் கேட்டுள்ளனர். சக வீரர்களுடன் ஆலோசித்த
தோனி மிகுந்த பெருந்தன்மையுடன் வாபஸ் பெறுவதாக தெரிவித்தார். இதையடுத்து
மீண்டும் பெல் களமிறங்க, முன்பு கூச்சலிட்ட அதே ரசிகர்கள், இந்திய அணிக்கு
பாராட்டு தெரிவித்தனர்.
இந்த முடிவால் பெரிய அளவில் பாதிப்பு
ஏற்படவில்லை. கூடுதலாக 22 ரன்கள் சேர்த்த நிலையில் யுவராஜ் சுழலில் பெல்
159 ரன்களுக்கு அவுட்டானார்.



ஸ்கோர் போர்டு
முதல் இன்னிங்ஸ்
இங்கிலாந்து 221
இந்தியா 288
இரண்டாவது இன்னிங்ஸ்
இங்கிலாந்து
ஸ்டிராஸ்(கே)தோனி(ப)ஸ்ரீசாந்த் 16(52)
குக்(கே)யுவராஜ்(ப)இஷாந்த் 5(11)
பெல்(கே)லட்சுமண்(ப)யுவராஜ் 159(206)
பீட்டர்சன்(கே)தோனி(ப)ஸ்ரீசாந்த் 63(120)
மார்கன்(கே)தோனி(ப)பிரவீண் 70(88)
பிரையர்-அவுட் இல்லை- 64(55)
டிராட்(கே)டிராவிட்(ப)பிரவீண் 2(10)
பிரஸ்னன்-அவுட் இல்லை- 47(66)
உதிரிகள் 15
மொத்தம்(101 ஓவரில் 6 விக்.,) 441
விக்கெட் வீழ்ச்சி: 1-6(குக்), 2-57(ஸ்டிராஸ்), 3-219(பீட்டர்சன்), 4-323(பெல்), 5-329(மார்கன்), 6-339(டிராட்).
பந்துவீச்சு:
பிரவீண் 29-5-93-2, இஷாந்த் 24-3-115-1, ஸ்ரீசாந்த் 22-5-103-2, யுவராஜ்
10-0-41-1, ஹர்பஜன் 9-1-47-0, ரெய்னா 7-0-30-0.