தமிழர் பிரச்னைக்கு விரைவில் அரசியல் தீர்வு: இலங்கையிடம் இந்தியா வலியுறுத்தல்

by **அருள்** Sun Jun 12, 2011 9:07 am

Last Updated :

தமிழர் பிரச்னைக்கு விரைவில் அரசியல் தீர்வு: இலங்கையிடம் இந்தியா வலியுறுத்தல் Srilanka

இலங்கை அதிபர் ராஜபட்சவை கொழும்பில் உள்ள அவரது இல்லத்தில் சனிக்கிழமை
சந்தித்தார் இந்தியாவின் தேசிய பாதுகாப்பு ஆலோசகர் சிவசங்கர் மேனன். உடன்
வெளியுறவு

கொழும்பு, ஜூன் 11: இலங்கையில் வாழும் தமிழர்கள் பிரச்னைக்கு விரைவில் அரசியல்
ரீதியில் தீர்வு காணுமாறு இந்தியா வலியுறுத்தியுள்ளது. இப்பிரச்னைக்கு விரைந்து
தீர்வு காணவேண்டியது அவசர அவசியமானது என்றும் இந்தியா குறிப்பிட்டுள்ளது.
இந்திய வெளியுறவுச் செயலர் நிருபமா ராவ், பாதுகாப்பு செயலர் பிரதீப் குமார்,
தேசிய பாதுகாப்பு ஆலோசகர் சிவசங்கர் மேனன் ஆகியோரடங்கிய இந்தியக் குழு அதிபர்
ராஜபட்சவை சனிக்கிழமை சந்தித்து பேசியது. அப்போது இக்கருத்து இந்தியா சார்பில்
வலியுறுத்தப்பட்டதாகத் தெரிகிறது.
இலங்கை இனப் பிரச்னைக்கு அரசியல் ரீதியில் தீர்வு காண்பதற்காக 1987-ம் ஆண்டே
13-வது அரசியல் சாசன சட்ட திருத்தத்தைக் கொண்டு வந்துள்ளது. இதன்படி ஈழத் தமிழர்
பகுதிக்கு சுய அதிகாரம் அளிப்பதில் இலங்கை அரசு தீவிரமாக உள்ளதாகத் தெரிகிறது என்று
சந்திப்புக்குப் பிறகு செய்தியாளர்களிடம் பேசிய சிவசங்கர் மேனன் கூறினார்.
இந்திய-இலங்கை அமைதி உடன்பாட்டிலும் இக்கருத்து எட்டப்பட்டது. ஆனால் தனித் த
மிழ் ஈழம் என்ற கோரிக்கையால் இது கைவிடப்பட்டது. இப்போது முந்தைய உடன்படிக்கையை
மேம்படுத்தி அமல்படுத்தும் என நம்புவதாக அவர் கூறினார்.
அதிபர் ராஜபட்சவுடன் இரண்டு மணி நேரம் இக்குழுவினர் சந்தித்து பல்வேறு
விஷயங்கள் குறித்து விரிவாக பேச்சு நடத்தினர். முன்னதாக அந்நாட்டு வெளியுறவு
அமைச்சர் ஜி.எல். பெரிஸ்ûஸயும் இந்தியக் குழுவினர் சந்தித்துப் பேசினர்.
இவர்கள் தவிர தமிழ்த் தலைவர்களையும் இவர்கள் சந்தித்துப் பேசினர்.
தமிழக சட்டப் பேரவையில் இலங்கை அரசுக்கு எதிராக பொருளாதார தடை விதிக்க
வேண்டும் என்ற தீர்மானம் ஒருமனதாக நிறைவேற்றப்பட்ட நிலையில் மத்திய அரசு சார்பில்
இக்குழுவினர் இலங்கை சென்று பேச்சு நடத்தியிருப்பது மிகுந்த முக்கியத்துவம்
பெறுகிறது.
தமிழக முதல்வர் ஜெயலலிதா குறிப்பிட்ட சில விஷயங்கள் குறித்து அதிபர்
ராஜபட்சவுடன் விவாதிக்கவில்லை என்று மேனன் கூறினார்.
இலங்கை பாதுகாப்புச் செயலர் கோத்தபய ராஜபட்ச, அதிபரரின் செயலர் லலித்
வீரதுங்க ஆகியோரையும் குழுவினர் சந்தித்துப் பேசினர். அப்போது இரு நாட்டு மீனவர்கள்
விஷயம் விவாதிக்கப்பட்டதாக மேனன் தெரிவித்தார். இரு நாட்டு மீனவர் சங்கங்களுடன்
பேச்சு நடத்தி இப்பிரச்னையை சுமுகமாகத் தீர்த்துக் கொள்ளலாம் என ஆலோசிக்கப்பட்டது.
இலங்கை போரின் போது நடைபெற்ற மனித உரிமை மீறல் விவகாரம் குறித்து
விவாதிக்கப்படவில்லை என்று அவர் குறிப்பிட்டார். கடந்த மாதம் இலங்கை வெளியுறவு
அமைச்சர் ஜி.எல். பெரிஸ், புது தில்லி வந்திருந்தபோது இலங்கைத் தமிழர் பிரச்னைக்கு
நியாயமான தீர்வு காணப்படவேண்டும் என்று வலியுறுத்தப்பட்டது. அத்துடன் மனித உரிமை
மீறல் குறித்து விசாரணை நடத்தப்பட வேண்டும் என்றும் கூறப்பட்டது. இதே கருத்தை
மேற்கத்திய நாடுகளும், ஐக்கிய நாடுகள் சபையும் வலியுறுத்தியிருந்தது
குறிப்பிடத்தக்கது.
இலங்கை செல்கிறார் பிரதமர் மன்மோகன்: முன்னதாக இலங்கைக்கு வருமாறு பிரதமர்
மன்மோகன் சிங்குக்கு அதிபர் ராஜபட்ச விடுத்த அழைப்பை ஏற்றுக் கொண்டதாக இலங்கை அதிபர்
மாளிகை செய்தித் தொடர்பாளர் பந்துல ஜெயசேகர உறுதி செய்தார்.
இது தொடர்பாக பிரதமர் அலுவலகம் அளித்த கடிதத்தை ராஜபட்சவிடம் மேனன் அளித்தார்.
இதற்கு முன்பு 2008-ம் ஆண்டு பிரதமர் மன்மோகன் சிங் இலங்கையில் சுற்றுப் பயணம்
மேற்கொண்டிருந்தார். விடுதலைப் புலிகள் முற்றிலுமாக அழிக்கப்பட்ட பிறகு மன்மோகன்
சிங் இலங்கைக்குப் பயணம் மேற்கொள்ள ஒப்புக் கொண்டிருப்பது மிகுந்த முக்கியத்துவம்
வாய்ந்த பயணமாகக் கருதப்படுகிறது.
ஐக்கிய நாடுகள் சபையில் இலங்கை போர்க்குற்றவாளியாக தீர்மானம் இயற்றப்பட்டால்,
அதைத் தடுக்க இந்தியா உதவ வேண்டும் என்ற கோரிக்கையை இலங்கை ஏற்கெனவே முன்வைத்துள்ள
நிலையில் பிரதமர் மன்மோகன் சிங் இலங்கைக்கு பயணம் மேற்கொள்ள உள்ளது
குறிப்பிடத்தக்கது.