சரத் பொன்சேகாவின் ஜெனரல் தரம் ‐ பிரஜா உரிமை ரத்துச் செய்யப்படுமா?

சரத் பொன்சேகாவின் ஜெனரல் தரம் ‐ பிரஜா உரிமை ரத்துச் செய்யப்படுமா?

ஜெனரல் சரத் பொன்சேக்காவுக்கு எதிராக இராணுவ நீதிமன்றத்தில் வழக்கு
தாக்கல் செய்து அவரது ஜெனரல் தரத்தை ரத்துச் செய்து, சாதாரண இராணுவச்
சிப்பாய் நிலைக்கு கொண்டுவருமாறு பாதுகாப்புச் செயலாளர், இராணுவத்
தளபதிக்கு உத்தரவிட்டுள்ளதாக இராணுவத் தலைமையகத் தரப்பு தகவல்கள்
தெரிவிப்பதாக சிங்கள இணையத்தளம் ஒன்றில் கூறப்பட்டுள்ளது.

சரத் பொன்சேக்கா இராணுவ தளபதியாகவும் கூட்டுப்படைகளின்
தலைமையதிகாரியாகவும் பணியாற்றிய போது, எதிர்க்கட்சியினருடன் இணைந்து
அரசுக்கும் ஜனாதிபதிக்கும் எதிராக செயற்பட்டார் என்ற குற்றச்சாட்டில்
இராணுவ நீதிமன்றத்தில் வழக்கு தாக்கல் செய்யப்படவுள்ளது.

இதனை தவிர சரத் பொன்சேக்காவின் பிரஜா உரிமையையும் ரத்துச் செய்ய வேண்டும்
என பாதுகாப்புச் செயலாளர் ஜனாதிபதியிடம் யோசனை முன்வைத்துள்ளதாக
நம்பதகுந்த தரப்பு தகவல்கள் தெரிவிப்பதாக அந்த இணையத்தளத்தில்
கூறப்பட்டுள்ளது.

கலாநிதி சேனக்க டி சில்வா குற்றப்புலனாய்வுப் பிரிவினரிடம் ஒப்படைப்பு:‐

இராணுவக் காவற்துறையினரால் நேற்றிரவு ஜெனரல் சரத் பொன்சேக்காவுடன்
கைதுசெய்யப்பட்ட அவரது தனிப்பட்ட செயலாளர் கலாநிதி சேனக்க டி சில்வா
குற்றப்புலனாய்வுப் பிரிவினரிடம் ஒப்படைக்கப்பட்டுள்ளதாக
தெரிவிக்கப்படுகிறது. சேனக்க டி சில்வா இலங்கை இராணுவத்தின் விசேடப்
படைப்பிரிவின் முன்னாள் கப்படன் ஆவார். இவர் பல வருடங்களுக்கு முன்னர்
இராணுவத்தில் இருந்து சட்ட ரீதியாக விலகிக் கொண்டதுடன் வர்த்தக நிறுவனம்
ஒன்றை நடத்தி வருகிறார்