ரயில்வே பட்ஜெட் புதிய அதிவிரைவு ரயில்கள்

by **Tamil** Fri Feb 26, 2016 8:09 am

வழக்கமாக இரண்டு நகரங்களுக்கு இடையே, புதிய ரயில்கள் அறிவிக்கப்படும். ஆனால், இந்த பட்ஜெட்டில், புதுமையாக, பல்வேறு புதிய ரயில் சேவைகளை அறிவித்தார் ரயில்வே அமைச்சர் சுரேஷ் பிரபு. பயணிகள் கட்டணத்தை உயர்த்தாத நிலையில், இந்த புதிய ரயில் சேவைகள் மூலம், கூடுதல் வருவாய் கிடைக்கும் என எதிர்பார்க்கப்படுகிறது.
ஹம்சபர்:
முழுவதும், ‘ஏசி’ வசதி உள்ளது இந்த ரயில் சேவை. இதில் தேவைப்படுவோருக்கு உணவும் பரிமாறப்படும்.
தேஜாஸ்:
புல்லட் ரயில்களுக்கு முன்னோடியாக இந்த வகை ரயில் சேவை அறிமுகம் செய்யப்படுகிறது. பொழுதுபோக்கு அம்சங்களுடன், இந்த ரயில் செல்லும் பாதையில் உள்ள உள்ளூர் உணவு வகைகள் பரிமாறப்படும். 130 கி.மீ., வேகத்தில் இயக்கப்படும் இந்த ரயிலில், ‘வைபை’ வசதியும் இருக்கும்.
உதய்:
தொழில் ரீதியாக இரண்டு நகரங்களுக்கு இடையே மிக அதிகமாக பயணம் செய்வோரை குறிவைத்து, இந்த ரயில் சேவை அறிமுகம் செய்யப்பட்டுள்ளது.
இந்த ரயில் சேவை. இரண்டடுக்கு உடைய, முழுவதும், ‘ஏசி’ வசதி கொண்ட இந்த ரயில், ஒரு நகரில் இருந்து இரவில் புறப்பட்டு, மறு நகரில் இருந்து மறுநாள் இரவு புறப்பட்டு திரும்பும் வகையில் இயக்கப்பட உள்ளது. இந்த ரயிலில் வழக்கமான அதிவேக ரயில்களைவிட, 40 சதவீதம் அதிகமானோர் பயணிக்கலாம்.
ரயில்வே பட்ஜெட் புதிய அதிவிரைவு ரயில்கள் Tamil_News_large_1465534

ரயில்வே பட்ஜெட் புதிய அதிவிரைவு ரயில்கள் Tamil_News_large_1465534

ஆஸ்தா:
நாட்டின் பல்வேறு முக்கிய, புண்ணிய தலங்களை இணைக்கும் வகையில், இந்த ரயில் சேவை இருக்கும்.
அந்த்யோதயா எக்ஸ்பிரஸ்:
சாதாரண மக்களுக்காக, முழுவதும் முன்பதிவு செய்யப்படாத, அதிவேக ரயில் சேவை. இந்த ரயிலில், மொபைல் போன் சார்ஜ் செய்யும் வசதி, குடிநீர் வசதி உள்ளிட்டவை இருக்கும்.
தீனதயாள் பெட்டி:
இதைத் தவிர, ‘தீனதயாள்’ பெயரில், முன்பதிவு செய்யாத ரயில் பெட்டிகளும் அறிமுகம் செய்யப்படும். இந்த பெட்டிகளில் கழிப்பறை, மொபைல் போன் சார்ஜ் செய்யும் வசதியும் இருக்கும். நீண்ட துார ரயில்களில், மூன்று அல்லது நான்கு தீன்தயாள் பெட்டிகள் இணைக்கப்படும்.
எதிர்பார்ப்புகளை பூர்த்தி செய்யவில்லை:
முதல்வர் ஜெயலலிதாபுதிய ரயில்கள், புது வழித்தடங்கள் குறித்து பட்ஜெட்டில் அறிவிக்கப்படாதது ஏமாற்றம் அளிக்கிறது. ரயில்வே பட்ஜெட்டில் இடம்பெற வேண்டிய தமிழக திட்டங்கள் குறித்து, பிப்., 11ல், பிரதமருக்கு கடிதம் எழுதினேன். அந்த திட்டங்கள் தொடர்பான எவ்வித அறிவிப்பும் வெளியாகாதது ஆச்சரியம் அளிக்கிறது.
அதே நேரம், ரயில்வே உதிரிபாக மையமாக (ரயில் ஆட்டோ ஹப்), சென்னை உருவாக்கப்படும்; டில்லி – சென்னை சரக்கு ரயில் பாதை, துாத்துக்குடி வரை விரிவுப்படுத்தப்படும் என அறிவித்திருப்பது வரவேற்புக்குரியது.
சென்னை – துாத்துக்குடி சரக்கு ரயில் பாதை, தமிழகத்தின் நீண்ட நாள் கோரிக்கை. அதேபோல், ரயில் பயணிகளுக்கான அடிப்படை வசதிகள், பெண்கள் பாதுகாப்பு, மாற்றுத்திறனாளி மற்றும் மூத்த குடிமகன்களுக்கான கூடுதல் வசதி தொடர்பான அறிவிப்புகளும் வரவேற்கத்தக்கதே. ரயில் கட்டணம் உயர்த்தப்படாததும் மகிழ்ச்சி அளிக்கிறது. எனினும் ரயில்வே பட்ஜெட், தமிழக மக்களின் எதிர்பார்ப்பை பூர்த்தி செய்யவில்லை.
எதிர்பார்த்த திட்டங்கள் இல்லை!
ரயில்வே பட்ஜெட்டில், தமிழகத்திற்கு எதிர்பார்த்த திட்டங்கள் குறித்த அறிவிப்பு இல்லாதது, பெருத்த ஏமாற்றமளிக்கிறது. ரயில்வே பட்ஜெட்டில்
குறிப்பிட்டுள்ளபடி, அரசு மற்றும் தனியார் கூட்டு முயற்சி மூலம், ரயில்வேயை மேம்படுத்தும்போது, ரயில்வே துறையை தனியாருக்கு, தாரை வார்த்து கொடுக்கக்கூடாது. மொத்தத்தில், இந்த ஆண்டுக்கான ரயில்வே பட்ஜெட், தமிழக மக்களின் எண்ணங்களையும், எதிர்ப்புகளையும் பிரதிபலிக்கவில்லை.வாசன், தலைவர் – த.மா.கா.,
பா.ஜ.,வுக்கு பாடம் புகட்டுவர்!
ரயில்வே பட்ஜெட் ஏமாற்றத்தை தருகிறது. ஏற்கனவே அறிவிக்கப்பட்ட தமிழக ரயில் திட்டங்களுக்கு, நிதி ஒதுக்கீடு செய்யவில்லை. தமிழகத்திற்கு தேவையான, ரயில் திட்டங்களை நிறைவேற்றுவதற்கு, மத்திய அரசோடு அ.தி.மு.க., வாதாடி பெறுவதற்கு தயங்குவது ஏனென்று தெரியவில்லை. முதல்வர் ஜெயலலிதா, பிரதமர் மோடிக்கு அடிக்கடி கடிதங்கள் எழுதுவதோடு, தம் கடமை முடிந்துவிட்டதாக கருதுகிறார். இதற்குரிய பாடத்தை, சட்டசபை தேர்தலில், அ.தி.மு.க., – பா.ஜ., கட்சிகள் பெறும்.இளங்கோவன், தலைவர், தமிழக காங்.,
சென்னைக்கு கிடைத்தது என்ன?
– நமது நிருபர் –
ரயில்வே பட்ஜெட்டில், சென்னைக்கு உட்பட்ட ரயில் பாதை திட்டங்களுக்கும் நிதி ஒதுக்கீடு செய்யப்பட்டது.
* சென்னை கடற்கரை – கொருக்குபேட்டை, மூன்றாவது வழித்தடத்திற்கு (4.1 கி.மீ.,) 60 கோடி ரூபாய்
* சென்னை கடற்கரை – அத்திப்பட்டு, நான்காவது வழித்தடத்திற்கு (22.1கி.மீ.,) 55 கோடி ரூபாய்
* சென்னை சென்ட்ரல் – பேசின்பாலம், ஐந்து மற்றும் ஆறாவது வழித்தடத்திற்கு (4 கி.மீ.,), 8.4 கோடி ரூபாய்
* சென்னை கடற்கரை ரயில் நிலையத்தில், கூடுதல் நடைமேடைக்கு, 40 லட்சம் ரூபாய் ஒதுக்கீடு செய்யப்பட்டு உள்ளது.
ஆண்டுக்கு, 700 கோடி பேர், ரயில்களில்
பயணிக்கின்றனர். ஒவ்வொரு பயணியும், ரயில்வேயின் விளம்பரத் துாதர்கள். ஒவ்வொருவரின் பயணமும் திருப்தியுடன் இருக்க வேண்டும் என்பதே எங்களின் கொள்கை.
சுரேஷ் பிரபு, ரயில்வே அமைச்சர்