காதலனிடம் காதலி எதிர்பார்க்கும் பரிசு என்ன?

காதலனிடம் காதலி எதிர்பார்க்கும் பரிசு என்ன?
உலகம் முழுவதும் இன்று காதலர் தினம் கொண்டாடப்படுகிறது. அன்பை பரிமாறிக்கொள்ளும் இந்த நாளில் பெரும்பாலான காதலர்கள் வழக்கமாக இரவு உணவுடன் காதலர் தினத்தை கொண்டாட விருப்பம் தெரிவித்துள்ளனர். மேலும் துணிச்சலான சில காதலர்கள், தங்கள் காதலிகளை ஹெலிகாப்டர் பயணத்துக்கு அழைத்து செல்ல விரும்புகின்றனர் என ஆய்வு முடிவு ஒன்று தெரிவித்துள்ளது. உலகம் முழுவதும் இன்று காதலர் தினம் கொண்டாடப்படுகிறது. தாங்கள் விரும்பும் ஆண்களுக்கு பெண்களும், பெண்களுக்கு ஆண்களும் பரிசுபொருட்களை வாங்கி தருவதும், வெளியிடத்துக்கு அழைத்து செல்வது வழக்கமாகும். மேலும் காதலர் தினத்தில் பூக்களை கொடுத்தும் தங்களது அன்பை வெளிப்படுத்துபவர்கள் ஏராளம். சமீபத்தில் எடுக்கப்பட்ட ஆய்வில் காதலர் தினத்தை எவ்வாறு கொண்டாட விரும்புகிறீர்கள் என சுமார் 3000 பேரிடம் கருத்துகேட்கப்பட்டது. இதில் சுமார் 45 சதவீதம் பேர் தங்களது பிரியமானவர்களை பிரபல உணவு விடுதிகள், ரெஸ்ட்டாரண்ட் போன்றவற்றுக்கு அழைத்து சென்று இரவு உணவுடன் காதலர் தினத்தை கொண்டாட  விருப்பம் தெரிவித்துள்ளனர். 39 சதவீதம் பேர் மனங்கவர்ந்தவர்களுக்கு பரிசு பொருட்கள் கொடுக்க விரும்புவதாக கூறியுள்ளனர். 18 சதவீதம் பேர், காதலர் தினத்தை ஸ்பெஷலாக கொண்டாடும் வகையில் ஹெலிகாப்டர் பயணத்துக்கு அழைத்து செல்ல விரும்புகிறோம் என கருத்தை பதிவு செய்துள்ளனர்.


பொதுவாக காதலர் தினத்தன்று ₹3000 முதல் ₹5 ஆயிரம் வரை பட்ஜெட் இருக்குமாறு பார்த்துக் கொள்வதாகவும் ஆய்வில் தெரியவந்துள்ளது. மேலும் சிலர் காதலர் தினத்தை முன்னிட்டு ஆன்லைனில் வரும் சலுகைகளை பயன்படுத்த பணத்தை செலவழிக்கின்றனர் என்றும் கூறப்படுகிறது.  40 சதவீத இந்தியர்கள் தங்களது காதலை வலுவாக்குதற்காக காதலர் தினத்தன்று சராசரியாக 3 ஆயிரம் ரூபாய் செலவழிக்கின்றனர். 10 சதவீதம்பேர் மட்டுமே தங்களது பிரியமானவர்களுக்கு பரிசு பொருட்கள் வாங்குவதற்காக ₹5ஆயிரத்தை செலவழிக்கின்றனர்.

காதலர் தின செலவுகளை தாண்டி தங்களது பிரியமானவர்களுக்கு பிடித்த சரியான பரிசுப்பொருட்களை தேர்வு செய்யவேண்டும் என்பதிலேயே 47 சதவீதம் பேர் குழப்பம் அடைவதாகவும், இதில் 25 சதவீதம்பேர் சரியான பரிசு பொருட்களை தேர்வு செய்கின்றனர். 13 சதவீதம் பேர் தங்களது காதலர்களுடன் ஜாலியாக காதலர் தினத்தை கழிக்கின்றனர் என்றும் ஆய்வில் கூறப்படுகிறது.  இந்த ஆண்டு காதலர் தினம் விடுமுறை நாளான ஞாயிறன்று வந்துள்ளதால் 33 சதவீதம் பேர் வீட்டிலேயே ஓய்வெடுக்க விரும்புவதாகவும், 16 சதவீதம்பேர் மட்டுமே வெளியே சென்று கொண்டாட திட்டமிட்டுள்ளதாகவும் ஆய்வு அறிக்கையில் தெரியவந்துள்ளது. காதலர் தினத்தன்று ஆண்களிடம் இருந்து பெண்களும், பெண்களிடம் இருந்து ஆண்களும் என்ன பரிசு பொருட்களை எதிர்பார்க்கிறார்கள் என்ற கேள்விக்கு, பூக்கள், நகை, துணிகள், அணிகலன்கள் இவற்றை பரிசுபொருட்களாக பெண்கள் விரும்புகின்றனர் என ஆண்கள் பதிலளித்துள்ளனர். அதேபோல் பெண்களிடம் இருந்து எலக்ட்ரானிக்ஸ் அல்லது பயனுள்ள பொருட்களை எதிர்பார்ப்பதாகவும் ஆண்கள் கருத்து தெரிவித்துள்ளனர்.