தென்ஆப்பிரிக்காவுக்கு எதிரான முதலாவது டெஸ்ட்: வலுவான நிலையில் இந்திய அணி...

by **மாலதி** Sat Dec 21, 2013 7:10 am

ஜோகன்னஸ்பர்க், டிச.21-

தென்ஆப்பிரிக்காவுக்கு எதிரான முதலாவது டெஸ்டில் புஜாரா, கோலியின் பொறுப்பான ஆட்டத்தால் இந்திய அணி வலுவான நிலையை நோக்கி பயணித்துக் கொண்டிருக்கிறது.

இந்தியா-தென்ஆப்பிரிக்கா கிரிக்கெட் அணிகள் இடையிலான முதலாவது டெஸ்ட் போட்டி ஜோகன்னஸ்பர்க் நகரில் நடந்து வருகிறது. முதல் இன்னிங்சில் இந்தியா 280 ரன்கள் சேர்த்து ஆட்டம் இழந்தது. பின்னர் தனது முதல் இன்னிங்சை தொடங்கிய தென்ஆப்பிரிக்கா 2-வது நாள் முடிவில் 6 விக்கெட்டுக்கு 213 ரன்கள் எடுத்திருந்தது. பிலாண்டர் 48 ரன்களுடனும், பாப் டு பிளிஸ்சிஸ் 17 ரன்களுடனும் களத்தில் இருந்தனர்.

இந்த நிலையில் 3-வது நாள் ஆட்டம் நேற்று நடந்தது. வேகக் கூட்டணி ஜாகீர்கானும், இஷாந்த் ஷர்மாவும் இணைந்து தென்ஆப்பிரிக்காவின் எஞ்சிய 4 விக்கெட்டுகளை வெறும் 45 நிமிடங்களுக்குள் கழற்றினர்.

இஷாந்த் ஷர்மா வீசிய முதல் பந்தை பவுண்டரிக்கு திருப்பி, பிலாண்டர் அரைசதத்தை கடந்தார். அதே ஓவரில் மேலும் ஒரு பவுண்டரியும் விரட்டினார். அவர் 59 ரன்களில் (86 பந்து, 7 பவுண்டரி), ஜாகீர்கானின் பந்து வீச்சில் முதலாவது ஸ்லிப்பில் நின்ற அஸ்வினிடம் கேட்ச் ஆனார். பிளிஸ்சிஸ்சும் (20 ரன்) ஜாகீர்கானுக்கு இரையானார்.

இதன் பின்னர் ஸ்டெயினை (10 ரன்) இஷாந்த் ஷர்மா வெளியேற்ற, மோர்கலை (ரன்) ஜாகீர்கான் வீழ்த்தி இன்னிங்சை முடிவுக்கு கொண்டு வந்தார். தென்ஆப்பிரிக்க அணி முதல் இன்னிங்சில் 244 ரன்களுக்கு ஆல்-அவுட் ஆனது. இதனால் இந்திய அணி 36 ரன்கள் முன்னிலை பெற்றது. இந்திய தரப்பில் ஜாகீர்கான், இஷாந்த் ஷர்மா தலா 4 விக்கெட்டுகளை கைப்பற்றி அசத்தினர்.

அடுத்து 36 ரன்கள் முன்னிலையுடன் இந்தியாவின் இன்னிங்சை முரளிவிஜயும், ஷிகர் தவானும் ஆரம்பித்தனர். மீண்டும் சொதப்பிய தவான் 15 ரன்களில் நடையை கட்டினார். அடுத்து விஜயுடன் புஜாரா இணைந்தார். இருவரும் நிதானமாக விளையாடி ஸ்கோரை படிப்படியாக உயர்த்தினர். அணி வலுவடைய உதவிய விஜய் 94 பந்துகளை சந்தித்து 39 ரன்கள் சேகரித்த நிலையில், காலிசின் பந்து வீச்சில் விக்கெட் கீப்பர் டிவில்லியர்சிடம் கேட்ச் ஆனார்.

இதைத் தொடர்ந்து புஜாராவும், விராட் கோலியும் 3-வது விக்கெட்டுக்கு கைகோர்த்தனர். இவர்கள் தென்ஆப்பிரிக்காவின் பந்து வீச்சை சாதுர்யமாக எதிர்கொண்டனர். புஜாரா 9 ரன்களில் இருந்தபோது ரன்-அவுட்டில் இருந்து தப்பினார். இதே போல் 51 ரன்களில் ஆடிக் கொண்டிருந்த போது அவர் கொடுத்த அருமையான கேட்ச் வாய்ப்பை பந்து வீசிய இம்ரான் தார் வீணடித்தார். இந்த வாய்ப்பை புஜாரா கெட்டியாக பிடித்துக் கொண்டார்.

இதன் பின்னர் புஜாரா-கோலி ரன் குவிப்பில் வேகம் காட்டினர். மோர்னே மோர்கலின் காயமும், பிரதான சுழற்பந்து வீச்சாளர் இம்ரான் தாரின் சாதாரண பந்து வீச்சும் இந்திய பேட்ஸ்மேன்களுக்கு சாதகமாக அமைந்தது. இந்த ஜோடியை பிரிக்க தென்ஆப்பிரிக்க கேப்டன் சுமித் பல்வேறு யுக்திகளை கையாண்டும் பலன் கிடைக்கவில்லை. ‘உலகின் நம்பர் ஒன்’ அபாயகரமான பந்து வீச்சாளர் ஸ்டெயினாலும் இவர்களை அசைக்க முடியவில்லை.

ஏதுவான பந்துகளை நாலாபுறமும் விரட்டியடித்து இந்திய ரசிகர்களை குஷிப்படுத்திய புஜாரா பவுண்டரி விளாசி தனது 6-வது சதத்தை பூர்த்தி செய்தார். தனது முதல் 50 ரன்களை 127 பந்துகளில் கொண்டு வந்த புஜாரா அடுத்த 50 ரன்களை வெறும் 41 பந்துகளில் திரட்டிவிட்டார். வெளிநாட்டு மண்ணில் இது அவரது முதல் சதமாகும். தென்ஆப்பிரிக்க மண்ணில் சதம் அடித்த 9-வது இந்தியர் புஜாரா ஆவார். இதற்கிடையே கோலி அரைசதத்தை கடந்தார்.

3-வது நாள் ஆட்ட நேர முடிவில் இந்திய அணி 2-வது இன்னிங்சில் 2 விக்கெட் இழப்புக்கு 284 ரன்கள் சேர்த்துள்ளது. புஜாரா 135 ரன்களுடனும் (221 பந்து, 18 பவுண்டரி), விராட் கோலி 77 ரன்களுடனும் (132 பந்து, 8 பவுண்டரி) ஆட்டம் இழக்காமல் இருக்கிறார்கள். இந்த இணை 3-வது விக்கெட்டுக்கு 191 ரன்கள் குவித்து இருப்பது குறிப்பிடத்தக்கது.

கைவசம் 8 விக்கெட் உள்ள நிலையில் இந்திய அணி இதுவரை 320 ரன்கள் முன்னிலை பெற்று ஓரளவு வலுவான நிலையை அடைந்துள்ளது. ஒரு நாள் தொடரில் ஆடிய விதத்தை பார்த்து இந்திய அணி டெஸ்டில் 3 நாட்களுக்குள் பெட்டி பாம்பாய் அடங்கிவிடும் என்று கணக்கு போட்டவர்களின் முகத்தில் நமது பேட்ஸ்மேன்களும், பந்து வீச்சாளர்களும் கரியை பூசி விட்டனர்.

4-வது நாள் ஆட்டம் இன்று பிற்பகல் 2 மணிக்கு தொடங்கி நடைபெறும்.