மாநில அரசு அதிகாரத்துக்கு ஆபத்து : பிரதமருக்கு ஜெயலலிதா கடிதம்!

by **mmani** Mon Aug 22, 2011 6:54 pm

மாநில அரசு அதிகாரத்துக்கு ஆபத்து : பிரதமருக்கு ஜெயலலிதா கடிதம்! Imp?urid=300700ef92d83043368&cr=8779&al=2888&sec=3385&pl=3155&as=3&ty=0&l=0

சென்னை: பிரதமர் மன்மோகன் சிங்குக்கு முதல்வர் ஜெயலலிதா எழுதியுள்ள
கடிதத்தில் கூறியிருப்பதாவது: கடந்த பட்ஜெட் கூட்டத்தொடரின்போது
மக்களவையில் சரக்கு மற்றும் சேவை வரி (ஜிஎஸ்டி) தொடர்பாக அரசியல் அமைப்பு
சட்டம் 115-வது திருத்த மசோதா தாக்கல் செய்யப்பட்டது. தற்போது இந்த மசோதா,
நிதி விவகாரங்களுக்கான நாடாளுமன்ற நிலைக்குழு பரிந்துரைக்கு அனுப்பி
வைக்கப்பட்டுள்ளது. நாடாளுமன்ற நிலைக்குழுவுக்கு தமிழக அரசின் கருத்துகள்
தனியாக அனுப்பி வைக்கப்பட்டுள்ளன. இருப்பினும் இந்த திருத்த மசோதா குறித்து
தமிழக அரசின் கவலைகளை தங்களுக்கு தெரிவிக்க விரும்புகிறேன்.

இந்த
மசோதா மாநில அரசின் அதிகாரங்களை பறிப்பதாக இருக்கிறது. மாநில அரசுகள்,
மக்களுடன் நெருக்கமாக இருப்பதால் அவர்களுக்கான அடிப்படை வசதிகள் மற்றும்
வளர்ச்சி திட்டங்களை வழங்குவதில் அதிக பொறுப்புகளை சுமந்து நிற்கின்றன.
நமது அரசியல் அமைப்பு சட்ட ஏற்பாட்டின்படி, மாநிலங்களின் வருவாய் ஆதாரங்கள்
குறைவாக உள்ளது. விற்பனை வரி ஒன்றே மிகப்பெரிய வருவாய் ஆதாரமாக உள்ளது.
மத்திய அரசு மேற்கொள்ளும் வரி சீர்திருத்தங்கள், இந்த வருவாயை குறைப்பதாக
இருக்கக் கூடாது. மாநிலங்களின் வரி ஆதாரத்தில் நிரந்தர பள்ளத்தை
ஏற்படுத்துவதாக அமையக்கூடாது.

வரி சீரமைப்பு என்ற பெயரில் வரி
விதிப்பில் மாநிலங்களுக்கு உள்ள குறைந்த அதிகாரமும் பறிக்கப்பட்டு விடுமோ
என்பது எங்களது முக்கிய கவலையாக இருக்கிறது. மாநிலங்களின் தேவைகள் பலவகையாக
இருக்கும் நிலையில், நாடு முழுவதும் அனைத்து சரக்குகளுக்கும் பொதுவான
வரியை விதிப்பதன் வாயிலாக வரிவிதிப்பில் சீரமைப்பை கொண்டுவர முடியாது.
ஜிஎஸ்டி அமல்படுத்தினால் தமிழக அரசுக்கு ஆண்டுக்கு ரூ.5 ஆயிரம் கோடி இழப்பு
ஏற்படும். இந்தக் கவலைகளை போக்கும் வகையில் ஜிஎஸ்டி உருவாக்கப்பட
வேண்டும்.

இந்த மசோதா நாடாளுமன்றத்தில் நிறைவேற்றப்படும் முன்பு
அனைத்து மாநிலங்களுடன் கலந்தாலோசிக்க வேண்டும். மசோதா தொடர்பான முக்கிய
பிரச்னைகளில் கருத்தொற்றுமை ஏற்படுத்த வேண்டும். எந்த ஒரு வரி
சீர்திருத்தமும் பொருளாதார நடவடிக்கைகளை ஊக்குவிக்கும் வகையில், பொது
மக்களுக்கு நன்மை அளிக்கும் வகையில் இருக்க வேண்டும். மாநிலங்களின் நிதி
சுதந்திரத்துக்கு பாதிப்பு ஏற்படுத்தாத வகையில் இருக்க வேண்டும்.

ஜிஎஸ்டி
தொடர்பான முக்கிய பிரச்னைகளில் மாநில அரசுகளுடன் கலந்தாலோசித்து
கருத்தொற்றுமை உருவாக்கிய பிறகே இந்த திருத்த மசோதாவை நாடாளுமன்றத்தில்
நிறைவேற்ற வேண்டும். இந்த விவகாரத்தில் நீங்கள் நேரடியாக தலையிட வேண்டும்.
இவ்வாறு கடிதத்தில் ஜெயலலிதா கூறியுள்ளார்.
இந்த விவகாரம் தொடர்பாக காங்கிரஸ் அல்லாத மாநில முதல்வர்களுக்கும் ஜெயலலிதா கடிதம் எழுதியுள்ளார்.