60/10 இது, மார்க் அல்ல; லஞ்ச ரேட்

கோவை அருகே, நள்ளிரவில் போக்குவரத்துத்துறை செக்போஸ்ட்டில் திடீர்
சோதனை நடத்திய லஞ்ச ஒழிப்பு போலீசார், 28 ஆயிரம் ரூபாய் லஞ்ச பணத்தை
கைப்பற்றினர். சுவற்றின் துளை மற்றும் ஆவணங்களுக்கு இடையே லஞ்ச பணம்
பதுக்கி வைக்கப்பட்டிருந்தது அம்பலமானது.
கோவை, மதுக்கரை, கந்தேகவுண்டன் சாவடியில் வட்டார
போக்குவரத்துத்துறையின் இரு செக்போஸ்ட்கள் உள்ளன. தமிழகத்தில் இருந்து
கேரளா செல்லும் வாகனங்களும், கேரளாவில் இருந்து தமிழகத்துக்குள் நுழையும்
வாகனங்களும் இங்கு சோதனையிடப்படுகின்றன. அதிக பாரம் ஏற்றி வருவது; வாகன
பர்மிட் இல்லாதது; பயண ஆவணம் இல்லாதது உள்ளிட்ட பல்வேறு விதிமீறல்களுக்கு
அபராதம் விதிக்கப்படுகிறது. இந்த செக்போஸ்ட்களில், விதிமீறி செல்லும் வாகன
டிரைவர்களிடம் போக்குவரத்துத்துறையினர் லஞ்சம் பெறுவதாக அடுத்தடுத்து
புகார்கள் எழுந்தன. இதையடுத்து, கோவை லஞ்ச ஒழிப்பு ஏ.டி.எஸ்.பி.,
சண்முகப்பிரியா தலைமையில் இன்ஸ்பெக்டர்கள் ஞானசேகரன், ஜெரால்டு ஆகியோர்
நேற்று முன் தினம் நள்ளிரவில், கேரளாவுக்கு செல்லும் வாகனங்களை
சோதனையிடும் செக்போஸ்ட்டில் திடீர் சோதனை நடத்தினர். நள்ளிரவு 12.00
மணிக்கு துவங்கிய சோதனை அதிகாலை 3.00 மணி வரை தொடர்ந்தது.
இதில், செக்போஸ்ட் அலுவலகத்தில் ஆவணங்களுக்கு இடையேயும், சுவற்றின்
துளையிலும், கம்ப்யூட்டர் யு.பி.எஸ்., சாதனங்களுக்கு அடியிலும் பதுக்கி
வைக்கப்பட்டிருந்த 28 ஆயிரத்து 220 ரூபாய் பறிமுதல் செய்யப்பட்டது.அபராத
வசூல் தொடர்பான அலுவலக ஆவணங்களுக்கு தொடர்பில்லாத இத்தொகை எப்படி வந்தது?
என, அங்கிருந்த மோட்டார் வாகன ஆய்வாளர் பிரேமா, அலுவலக உதவியாளர்கள்
கங்கையம்மாள், அப்துல்ரகுமான் ஆகியோரிடம், லஞ்ச ஒழிப்பு அதிகாரிகள்
விசாரித்தனர். "பறிமுதல் செய்யப்பட்ட பணத்துக்கும், தங்களுக்கும் எவ்வித
தொடர்பும் இல்லை' என, மூவரும் கைவிரித்துவிட்டனர். பணம் பறிமுதல்
செய்யப்பட்டு குற்றவியல் நடைமுறைச் சட்டம் 102 (யாராலும் உரிமை கோரப்படாத
சொத்து) பிரிவில் வழக்குப் பதிவு செய்யப்பட்டது.
விசாரணையில் அம்பலம்: லஞ்ச ஒழிப்பு போலீசாரால் பறிமுதல் செய்யப்பட்ட 28
ஆயிரத்து 220 ரூபாய், ஒரே இரவில், அதுவும் பாதி பணி நேரத்துக்குள் வசூலான
தொகை ஆகும். இந்த செக்போஸ்ட் வழியாக பல்வேறு விதிமுறைகளை மீறி கேரளாவுக்கு
சென்ற வாகனங்களின் டிரைவர்களுக்கு போக்குவரத்து துறையினர் அபராதம்
விதிக்காமல், லஞ்சம் பெற்று மேற்கொண்டு செல்ல அனுமதித்துள்ளனர். இதன்
மூலம், மாநில அரசுக்கு வருவாய் இழப்பை ஏற்படுத்தியுள்ளனர். ஒரே இரவில்,
அதுவும் பாதி பணி நேரத்திலேயே இவ்வளவு லஞ்சத்தொகை வசூலாகியிருக்கிறது
என்றால், மாதம் முழுவதும் எவ்வளவு லட்சம் ரூபாய் முறைகேடாக
வசூலிக்கப்பட்டிருக்கும் என்ற கேள்விகள் எழுந்துள்ளன.
இது குறித்து, லஞ்ச ஒழிப்பு போலீசார் கூறியதாவது:குறிப்பிட்ட ஒரு
விதிமீறலுக்கு வாகன டிரைவர் 3,000 ரூபாயை சட்டப்படியாக அபராதம் செலுத்த
நேரிடும் போது, 500 முதல் 600 ரூபாயை லஞ்சமாக கொடுத்து தப்பிச்
செல்கின்றனர். அதாவது, அபராத தொகையில் ஆறில் ஒரு பங்கு அல்லது ஐந்தில் ஒரு
பங்கு தொகை லஞ்சமாக கைமாறுகிறது. இதன் மூலமாக, அரசுக்கு பெரும் வருவாய்
இழப்பு ஏற்படுகிறது. செக்போஸ்ட் பணி அதிகாரிகள், ஊழியர்கள், மாதம் தோறும்
தங்களுக்கு நிர்ணயிக்கப்படும் சட்டப்படியான அபராத வசூல் இலக்கை மட்டுமே
எட்டுகின்றனர். இலக்கை தொட்ட பின், லஞ்ச வசூலில் தீவிரமாக ஈடுபடுகின்றனர்.
அதாவது, நூற்றுக்கு 40 சதவீத வாகனங்களுக்கு மட்டுமே அபராதம்
விதிக்கப்பட்டு, 60 சதவீத வாகன டிரைவர்களிடம் லஞ்சம் பெறப்படுவதாக
தகவல்கள் வந்துள்ளன; இதுகுறித்து விசாரணை நடக்கிறது. இவ்வாறு, லஞ்ச
ஒழிப்பு போலீசார் தெரிவித்தனர்.

இது ஒரு தொடர்கதை.
லஞ்சம் என்பது வாழ்க்கை முறை.
இது தான் இன்றைய நிலை.
அவலநிலை மாறது.
மாற்ற முடியாது.