பாத்திரத்தை தலையில் மாட்டிய ஆண் குழந்தை: 3 மணி நேர போராட்டத்திற்கு பின் அகற்றம்

பாத்திரத்தை தலையில் மாட்டிய ஆண் குழந்தை: 3 மணி நேர போராட்டத்திற்கு பின் அகற்றம்

கேரள மாநிலம் திருச்சூர் சிறையம்மன் பகுதியை சேர்ந்தவர் சினோய். இவரது 1½ வயது மகன் அக்தஜி. நேற்று மாலை அக்தஜியின் தாய் வீட்டில் சமைத்துக்கொண்டிருந்தார்.
பக்கத்து வீட்டு குழந்தைகளுடன் அக்தஜி வீட்டுக்குள் விளையாடினான். சமையல் அறை அருகே விளையாடிய குழந்தைகளை அக்தஜின் தாய் அவ்வப்போது கவனித்துக்கொண்டார்.
விளையாட்டின் உச்சமாக சக குழந்தை ஒன்று சமையல் அறையில் இருந்த சில்வர் பாத்திரத்தை எடுத்து அக்தஜியின் தலையில் மாட்டியது. தொப்பி என்று நினைத்த குழந்தை அக்தஜி சில்வர் பாத்திரத்தை தலையில் வைத்து அழுத்தியது. இதில் சில்வர் பாத்திரம் குழந்தையின் தலையை முற்றிலும் மறைத்து மாட்டிக்கொண்டது.

தலை சிக்கிக்கொண்ட சிறுவன் மூச்சு திணறினான். பாத்திரத்தை எடுக்க முயற்சி செய்தான். ஆனால் முடியவில்லை. இது பக்கத்தில் இருந்த குழந்தைகளுக்கு என்ன நடக்கிறது என்று அறிய முடியவில்லை. குழந்தை அழத்தொடங்கியது. சமைத்துக்கொண்டிருந்த அக்தஜிதாவின் தாய் குழந்தையை பார்க்காமலேயே அழாதே என்று அதட்டினார்.
குழந்தை அழுவதை நிறுத்தவில்லை. குழந்தையின் அழுகுரல் வித்தியாசமாக இருந்தை தொடர்ந்து அருகில் அவரது தாய் வந்து பார்த்தார். அப்போது குழந்தையின் தலை முற்றிலும் சில்வர் பாத்திரத்திரத்திற்குள் நுழைந்திருப்பதை கண்டு அதிர்ச்சியடைந்தார்.
சில்வர் பாத்திரத்தை அகற்ற முயன்றார் ஆனால் முடியவில்லை. தாயும் அலறி சத்தம்போட்டார். அலறல் சத்தம் கேட்டு அக்கம் பக்கத்தினர் மற்றும் உறவினர்கள் ஓடிவந்தனர். குழந்தையின் தலையில் சிக்கிய சில்வர் பாத்திரத்தை அகற்ற 2 மணி நேரம் போராடினர். ஆனால் முடியவில்லை. குழந்தைக்கு ஏதாவது விபரீதம் நடந்து விடுமோ என்ற தாய் மற்றும் உறவினர்கள் கதறி அழத்தொடங்கினர்.
அங்கிருந்து ஒருவர் குழந்தையை தீயணைப்பு துறைக்கு கொண்டு செல்லுங்கள். அவர்கள் காப்பாற்றி விடுவார்கள் என்று கூறினார். அடுத்த வினாடியே காரில் குழந்தையை தூக்கிக்கொண்டு புறப்பட்டனர். 10 கி.மீட்டர் தொலைவில் இருந்த தீயணைப்பு நிலையத்துக்கு சென்று விபரத்தை கூறினர்.

தீயணைப்பு அலுவலர் லாசர் தலைமையிலான குழுவினர் குழந்தையின் தலையில் மாட்டியிருந்த பாத்திரத்தை கட்டிங் பிளேயர் உள்ளிட்ட ஆயுதங்களை கொண்டு அகற்ற முயன்றனர். ஆனால் அந்த முயற்சிக்கு பலன் கிடைக்கவில்லை.
நேரம் அதிகரிக்க அதிகரிக்க பெற்றோர் மற்றும் உறவினர்களின் முகத்தில் இறுக்கம் அதிகமானது. தீயணைப்பு துறையினர் ஹைட்ராலிக் எந்திரம் மூலம் பாத்திரத்தை வெட்டி அகற்ற முடிவு செய்தனர்.
அதன்படி குழந்தையின் தாய் அருகில் வரவழைக்கப்பட்டு பேச்சு கொடுக்க வைத்தனர். அக்தஜியின் தாய் சமாதானப்படுத்தினார். அந்த சமயத்தில் ஹைட்ராலிக் எந்திரம் மூலம் குழந்தையின் கழுத்து வரை மாட்டியிருந்த சில்வர் பாத்திரத்தை வெட்டி அகற்றினர். அப்போதுதான் பெற்றோரும், உறவினர்களும் நிம்மதி பெருமூச்சு விட்டனர்.
பாத்திரம் தலையிலிருந்து நீக்கப்பட்டவுடன் குழந்தை தாயை பார்த்து சத்தம் போட்டு அழத்தொடங்கியது. வாரி அணைத்துக்கொண்ட தாய் குழந்தையை கட்டித்தழுவினார். சிறிது நேரத்தில் குழந்தை சிரிக்க தொடங்கியது. அக்கம் பக்கத்தினரும் சிரிக்கத்தொடங்கினர். 3 மணி நேர போராட்டத்துக்கு பின்னர் சிரிப்பொலி அடங்க சிறிது நேரம் ஆனது.