எவ்வளவு நாட்களாக நீங்கள் காதலிக்கிறீர்கள்?

by **sakthy** Fri Apr 04, 2014 9:19 pm

எவ்வளவு நாட்களாக நீங்கள் காதலிக்கிறீர்கள்?

நான் காதலித்தால், உடனே அம்மாவிடம் இருந்து ,
உடனே வந்து விடு,வெளி நாடு போதும் என்று கடுமையாக கடிதம் வரும். அதனால் நான் காதலிக்கவில்லை. காதலிக்க நேரமும் கிடையாது. ஆனாலும் காதலித்தவர்களிடம், காதலிப்பவர்களிடம் தான் இந்தக் கேள்வி.
என்ன கேள்வி இது, என்று உங்கள் மனத்தில் கேள்வி எழும்.

காதல் செய்வதை தமிழர்கள் ஆதரித்தார்கள்,ஏற்றுக் கொண்டார்கள் என்று சங்க நூல்கள் சொல்லுகின்றன. ஆனாலும் அதற்கு ஒரு விதிமுறை உண்டு என்கிறது தமிழ்க் கலாச்சாரம். இன்று பலர் சொல்லக் கேட்டிருப்போம்,சில மாதக் காதல்,சில வருடக் காதல்,பல வருடங்களாக காதலிக்கிறோம் என பல பதில்கள் வரும். ஆனால் ஒரு சிலரோ ஒரு சில மணி நேரத்தில்,ஏன் சில நிமிடங்களில் கூடக் காதலிக்கத் தொடங்கி விடுவார்கள். அவை எல்லாம் நீதிமன்றங்களில் போய் முடிவதையும் காண்கிறோம்.

ஆனால்......

களவினுள் தவிர்ச்சி வரைவின் நீட்டம்
திங்கள் இரண்டின் அகமென மொழிப, என்று இறையனார் களவியல் சொல்கிறது.அதாவது களவாகிய காதல் இரண்டு மாத காலம் தான் நிகழ வேண்டுமாம். அதன் பின் திருமணம் செய்து கொள்ள வேண்டும்.காதலிப்பதற்கும் ஒரு கால அளவுண்டு என்பதை, களவும் கற்று மற, (இதையும் நாம் மாற்றி விட்டோம்) என்ற முதுமொழி மூலம் உணர்த்தினார்கள் நம் தமிழ்ப் பெரியோர்கள்.

காதலித்துக்கொண்டே இருந்துவிடக் கூடாது காதல் திருமணமாக மாறவேண்டும் என்பதே, நம் முன்னோர் வகுத்த மரபாகும். எப்போது காதலித்தவன் பெண்ணை கழற்றிவிடத் துணிந்தானோ,அன்று திருமணத்தின் அவசியம் வந்து விட்டது. இன்னும் சொல்லப் போனால், கற்பு என்பது பெண்களுக்கு மட்டும் இருக்கவேண்டிய ஒன்று என்ற சிந்தனை எப்போது தோன்றியதோ, அன்றே திருமணத்துக்கான தேவையும் தோன்றிவிட்டது என்று சொல்லலாம்.

கற்பு என்றால் ஒழுக்கம் என்று பொருள். அது ஆண்,பெண் இருபாலருக்குமே பொதுவானது. சில ஆண்கள் பெண்களைக் காதலி்த்துவிட்டு ஏமாற்றிய சூழலில் தான்,கற்பு-ஒழுக்கம்- தவறிய, இந்த மன்மதக் குஞ்சுகளைக் கட்டுப்படுத்த திருமணம் என்ற சடங்கு பெரியோர்களால் உருவாக்கப்பட்டது.

பொய்யும் வழுவும் தோன்றிய பின்னர் ஐயர் யாத்தனர் கரணம் என்ப, என்கிறது தொல்காப்பியம்.
பொய்சொல்லுதல், ஏமாற்றுதல்,காதலித்து விட்டு ஏமாற்றுதல், திருமணம் செய்துகொள்வேன் எனக் கூறி கால நீட்டிப்பு செய்தல், இப்படியான செயல்கள் தோன்றத் தொடங்கியதன் விளைவே,திருமணம் என்ற மணச்சடங்கு பெரியோர்களால் உருவாக்கப்பட்டது,என்கிறார் தொல்காப்பியர். இங்கே கரணம் என்பது மணச்சடங்கு,திருமணத்தைக் குறிக்கும்.

எனவே காதலிப்பவர்கள், ஆணையோ பெண்ணையோ ஏமாற்றாது, முடிந்தவரை விரைவில் திருமணம் செய்து கொள்ள வேண்டும். கவர்ச்சியால் உருவாகும் காதல் நிலைத்ததில்லை.அது ஒரு மோகம் -infatution – venereal appetite – என்றுதான் சொல்ல வேண்டும்.

இந்த சமயத்தில், ஆயிரம் பொய் சொல்லி திருமண செய் என்பது தவறானது என்பதும், ஆயிரம் முறை போய் சொல்லி திருமணம் செய் - என்பதே சரியான விளக்கம் என்பதையும் நாம் நினைவில் கொள்ள வேண்டும்.

தமிழ் நாட்டிலும் தமிழுக்கு இன்னமும் இடம் கிடைக்கல,புதியதமிழிலும் தமிழுக்கு இன்னமும் இடம் கிடைக்கல..........அதனால் இங்கே வந்தேன்.

by **krishnaamma** Sat Apr 05, 2014 6:58 am

தமிழ் நாட்டிலும் தமிழுக்கு இன்னமும் இடம் கிடைக்கல,புதியதமிழிலும் தமிழுக்கு இன்னமும் இடம் கிடைக்கல..........அதனால் இங்கே வந்தேன்.

அதற்கு புதியதமிழ் என்ன செய்யணும்

by **sakthy** Sat Apr 05, 2014 4:24 pm

சினிமாவிற்கு -நடிகர் நடிகைகளூக்கு, விளையாட்டுக்கு- IPL ற்கு, அலைபேசிக்கு-Mobile ற்கு-Nokia விற்கு,கதைகளுக்கு ஒன்று-தென்னாலிராமனுக்கு ஒன்று,மருத்துவத்திற்கு -7 ,
கணினிக்கு -3 ,இப்படி ஒரு விடயம்- பல தலைப்பு.இது கொஞ்சம் ஓவராக இல்லையா அண்ணா/அக்கா.

இல்லாத இந்துக் கடவுளுக்கு,மத வெறியுடன் இருக்கும் மதங்களுக்கு, தனி இடம் இருக்கு,சாதிக்கு மட்டும் இன்னமும் வரவில்லை. அதற்கு ஒரு தலைப்பு வருவதற்கு முன் தாய்த் தமிழுக்கு ஒரு இடம் வரும் என நம்புகிறேன்.

தாய்த் தமிழில் எழுதும் அல்லது தமிழ் பற்றிய கட்டுரை பதிவுகளுக்கு ஒரு தலைப்பு இல்லையே!
பள்ளியில்,கல்லூரிகளில் தமிழை தூக்கிப் போட்டோம். அம்மா,அப்பாவை தூக்கிப் போட்டு,டாடி மம்மியை எடுத்துக் கொண்டோம்..
இனித் தூக்கிப் போட என்ன இருக்கிறது?

ஏற்கனவே ஜனனி அக்காவிடம் சொல்லியாயிற்று. தேர்தல் வேலகள் முடிந்ததும், சரி செய்து விடுவார் என நம்புவோம்.