வட கிழக்கில் சிங்கள இராணுவத்தை அகற்ற வேண்டும் என்ற கோரிக்கையை கைவிட்டது அமெரிக்கா !

by **mmani** Tue Mar 18, 2014 12:57 pm

வட கிழக்கில் சிங்கள இராணுவத்தை அகற்ற வேண்டும் என்ற கோரிக்கையை கைவிட்டது அமெரிக்கா !
18 March, 2014

வட கிழக்கில் சிங்கள இராணுவத்தை அகற்ற வேண்டும் என்ற கோரிக்கையை கைவிட்டது அமெரிக்கா ! 1977064_683022321754891_1184215572_n

இலங்கையை தண்டிப்பது போலவும், தமிழர்களுக்கு உதவுவதுபோலவும் வேடமிட்டு நாடகம்
ஆடிவந்த அமெரிக்காவின் முகத்திரை தற்போது மெல்ல மெல்ல கிழிய ஆரம்பித்துள்ளது. இம்முறை அமெரிக்கா கொண்டுவரவுள்ள தீர்மானத்தில், இலங்கைக்கு மேலதிகமாக இன்னும் 1 வருட கால அவகாசம் வழங்கப்படவுள்ளது. சர்வதேச சுயாதீன விசாரணை நடத்தப்படவேண்டும் என்ற கோரிக்கையும் கைவிடப்பட்டுள்ளது. போதாக்குறைக்கு, வட கிழக்கில் இருந்து இலங்கை இராணுவம் விலக்கி கொள்ளப்படவேண்டும் என்ற கோரிக்கையையும் அமெரிக்கா விலக்கிக்கொண்டுள்ளது என தற்போது அறியப்படுகிறது. இதனை தமிழ் நெட் ஆங்கில இணையமும் உறுதிசெய்துள்ளது. அமெரிக்காவின் மாயா ஜாலம் என்ன ? இதோ தற்போது நிகழ்ந்துகொண்டு இருக்கும் ஒரு சர்வதேச சம்பவமே இதற்கு சிறந்த உதாரணம் ஆகும். அது என்ன என்று பார்போம்.
"கிரைமியா" என்னும் தேசத்தைப் பற்றி பலர் அறிந்திருக்க வாப்பில்லை. யூக்கிரேன் நாட்டின் கிழக்குப் பகுதியில் மற்றும் ரஷ்யாவுக்கு அருகாமையிலும் இந்த தன்னாட்சி அதிகாரம் கொண்ட பாரிய மாநிலம் ஒன்று இருக்கிறது. இது ஒரு நாடு அல்ல. யூக்கிரேன் நாட்டின் ஒரு பகுதி ஆகும். இங்கே கடந்த சில நாட்களுக்கு முன்னர் ஒரு தேர்தல் நடத்தப்பட்டது. அதில் 97 சதவீதமான கிரைமியர்கள் தாம் ரஷ்யாவுடன் இணைய ஆசைப்படுவதாக வாக்களித்துள்ளதாக கிரைமிய அதிகாரசபை தெரிவித்துள்ளது. மறு நிமிடமே ரஷ்யா அதனை ஏற்றுக்கொண்டுள்ளது. இதனால் கிரைமியா என்னும் தேசம் ஒரு நாடாக அங்கிகரிக்கப்பட்டுள்ளதோடு, அது ரஷ்யாவுடன் இணையவும் உள்ளது. இதனை அமெரிக்கா கடுமையாக எதிர்கிறது. நடந்த தேர்தல் முறைகேடான மற்றும் தில்லுமுல்லான தேர்தல் என வால் பிடிக்கும் பிரித்தானியவும் சேர்ந்து குரல் கொடுக்கிறது.
ரஷ்யா மேலும் பலம்பெறுவதை அமெரிக்கா விரும்பவில்லை. ஆனால் கிரைமிய மக்கள் கொடுத்துள்ள ஆணையை அமெரிக்கா எவ்வாறு நிராகரிக்க முடியும் ? ஒரு நாட்டில் உள்ள மக்கள் தாம் பிரிந்து செல்ல விரும்புவதாக வாக்களித்தால், அதனை உலக நாடுகள் ஏற்றுக்கொள்ளவேண்டும். ஆனால் இங்கே அமெரிக்கா அதனை விரும்பவில்லை. உடனடியாக யூக்கிரேன் நாட்டிற்கு ஆதரவாக களத்தில் இறங்க ஆரம்பித்துள்ளது. அமெரிக்க தூண்டுதலை அடுத்து, யூக்கிரேன் நாடு தனது படைகளில் சுமார் 20,000 ஆயிரம்பேரை ரஷ்யா நோக்கி நகர்த்தியுள்ளது. இதேவேளை ரஷ்யா தனது 40,000 படை வீரர்களை கிரைமியாவுக்குள் அனுப்பி அந்த தேசத்தை தனது கட்டுப்பாட்டினுள் கொண்டுவந்துள்ளது. தமது பிராந்தியப் பிரச்சனையில் அமெரிக்கா தலையிடவேண்டாம் என ரஷ்யா தற்போது எச்சரித்துள்ளது. இச் சம்பவமானது எமக்கு எதனை உணர்த்துகிறது என்று பார்த்தால், அமெரிக்கா முழுக்க முழுக்க தன் சுய நலத்திற்காக எதனையும் செய்யும் என்பது புலப்படுகிறது.
ரஷ்யா பலம் பெற்றுவிடக்கூடாது என்ற ஒரு காரணத்திற்காக கிரைமிய மக்கள் கொடுத்த ஆணையை உதாசீனம் செய்கிறது அமெரிக்கா. இதற்கு மேலாகவும் ஒரு விடையம் இன்று நடந்தேறியுள்ளது. அதாவது ரஷ்ய அதிபருக்கு மிக நெருக்கமான 11 பேருக்கு மற்றும் சில ரஷ்ய இராணுவத் தளபதிகளுக்கு அமெரிக்கா பயணத்தடையை விதித்துள்ளது. அவர்களின் சொத்துக்களை அமெரிக்கா முடக்கியும் உள்ளது. ஆனால் இனப்படுகொலை புரிந்த கோட்டபாயவின் அமெரிக்க கிரீன் அட்டை, இன்று வரை தடைசெய்யப்படவே இல்லை. பிரித்தானியா மற்றும் அமெரிக்காவில் உள்ள இலங்கை இராணுவத்தினரின் மற்றும் கோட்டபாயவின் சொத்துக்கள் முடக்கப்படவில்லை. அவை அனைத்தும் அப்படியே உள்ளது. அதாவது இலங்கை சீனாவை நோக்கிச் செல்கிறது. இதனை உடைத்து, இலங்கையை தன் பக்கம் இழுக்கவே தமிழர்களின் பிரச்சனையை ஒரு கருவியாக அமெரிக்கா பயன்படுத்துகிறது. எப்போது இலங்கை அமெரிக்காவின் காலில் சாஷ்டாங்கமாக விழுகிறதோ, அன்று அமெரிக்கா இவை அனைத்தையும் தூக்கி எறிந்துவிடும். "தமிழர்களா.... யார் அவர்கள்" ? என்று அமெரிக்கா கேட்க்கும். அப்போது நாம் மீண்டும் 2009ம் ஆண்டுக்கு பின்நோக்கிச் சென்று இருப்போம்.
மீண்டும் ஒரு முள்ளிவாய்க்கால் உருவாகும். இதனால் எதனையும் எதிர்பாராமல், அமெரிக்காவின் உதவி இல்லாமல் பாதிக்கப்பட்ட சமூகங்களோடு இணைந்து , உண்மையாக எமக்கு உதவ உள்ள நாடுகளை இனங்கண்டு, மற்றும் ஐ.நா போன்ற அமைப்புகளுடன் இணைந்து போராடினால் தான் நாம் எமது இலக்கை எட்டமுடியும். அமெரிக்கா வந்து எமக்கு கோப்பி போட்டுத் தரும் ! அமெரிக்கா வந்து எமக்கு பால்சோறு ஊட்டிவிடும் என்று நாம் கனவு கண்டோமேயானால் எம்மைப் போன்ற அடிமுட்டாள்கள் எவருமாக இருக்க முடியாது. அத்தோடு அமெரிக்காவை நம்புங்கள் ! என்று குரல்கொடுக்கும் சிலர் , பல குழப்பங்களை விளைவித்து வருகிறார்கள். இவர்கள் யார் என்று பார்த்தால், தொலைநோக்கு சிந்தனை அற்றவர்களாக இருக்கிறார்கள். இவர்கள் கண்மூடித்தனமாக அமெரிக்காவை நம்பும் கோஷ்டியினர். மேலும் இவர்களில் சிலர், ஏற்கனவே அமெரிக்க ஏஜண்டுகளால் மூளைச் சலவை செய்யப்பட்டவர்களாகவே இருக்கிறார்கள். இறுதிக் கட்டத்தில் முள்ளிவாய்க்காலுக்கு அமெரிக்க கப்பல் வருகிறது என்று பொய்யான புரளியை கிளப்பிவிட்டவர்களும் இவர்களே. இவர்களே இவ்வாறு புலிகளின் தலைமைக்கு பிழையான செய்தியை கொடுத்தவர்கள் ஆவர்.
தமிழர்களை பொறுத்தவரையில், பலர் போராட்டங்களில் ஈடுபட்டு தமது இலட்சியத்தை அடைய பாடுபடுகிறார்கள். ஆனால் சில குழப்பவாதிகள் இந்தியாவை நம்பவேண்டும், அமெரிக்காவை நம்பவேண்டும் என்று புராணம் பாடுவதை தொழிலாகக்கொண்டு இருக்கிறார்கள். இவர்கள் போன்ற புல்லுருவிகள் முதலில் அகற்றப்படவேண்டும். மக்கள் தெளிவுபெறவேண்டும். யதார்த்தம் எது ? உலக நடப்பு என்ன ? மேற்குலகம் என்ன செய்கிறது ? எதில் கவனம் செலுத்துகிறது என்பது போன்ற விடையங்களை தமிழர்கள் நன்றக அறிந்தும் புரிந்தும் வைத்திருத்தல் வேண்டும். அப்படி என்றால் தான் இந்த அமெரிக்க குழப்பவாதிகளிடம் நீங்களும் சிக்காமல் இருக்க முடியும். இதுவே எமது விடுதலைக்கான பாதையை அமைத்துக் கொடுக்கும், என்பதில் ஐயமில்லை.