எவரேனும் இப்படி காதலித்ததுண்டா (11)

by **ஜனனி** Sun Feb 28, 2010 7:40 pm

நம் கல்லூரி
வளாகத்தில் -
நீ என் பின்னே
நடந்து வருகிறாய்
அறை முழுதும் கேட்கும்
உன் காலடி சப்தத்தில்
என் இதயம் -
காதல் காதல் என்கிறது!
-------------------------------------------------------------

உன் கைப்பையில்
என்னென்னவோ
வைத்திருக்கிறாய்
இடையே என் புகைப்படம் கூட
வைத்திருப்பதாய் -
உன் தோழி சொன்னாள்;

உன் காதலின் அர்த்தம்
நீ திரும்பிப் பார்க்காமல் செல்வதில்
வலிக்கத் தான் செய்தது;

சரி போடி என
விட்டுத் தான் பார்த்தேன் -
நீ அலைந்து அலைந்து என்னை
தேடியதில் -
உயிர் கொள்கிறது
உனக்கான காத்திருப்பு!
-------------------------------------------------------------

அது ஏனோ
உனக்கு அப்படி ஒரு
வெட்கம் -
சிரித்துக் கொண்டே வெளியே
ஓடி வந்தாய்
வாசலில் நான் நிற்பதை
கண்டதும் -
நின்று - தயங்கி -
நிமிர்ந்தென்னைப் பார்த்து
திரும்பி வீட்டிற்குள்ளேயே ஓடுகையில்
சத்தமில்லாமல் சிரித்தாயே
அந்த சிரிப்பும் பார்வையும் தவிர
வேறொன்றுமே இல்லை
நீஎன்னை காதலிப்பதற்கான
சாட்சி!
-------------------------------------------------------------

உனக்கும் எனக்கும்
ஆயிரம் -
போருத்தமுண்டோ இல்லையோ
எதையும் விட்டுக் கொடுக்க
முனைந்ததில் -
எதையும் ஏற்றுக் கொள்ள
மனதொத்துப் போனதில்
வீட்டில் கேட்காமலேயே
கொடுத்துக் கொண்டோம்
நம் காதலுக்கான சம்மதத்தை!

எத்தனை லட்சியங்கள்
உனக்கும் எனக்கும்;

படிக்க வேண்டும்
நன்றாக வளர வேண்டும்
சமூகம் புரியவேண்டும்
எதையேனும் சாதித்து -
நான் - இன்னார் பிள்ளையென்று
சொல்லல் வேண்டும்

திருமணத்திற்கு முன்
என் உறவுகளுடனான இருப்பை
முழுதாய் வாழவேண்டும்

என் அன்பில் பிணைந்தென் குடும்பம்
உன்னை முழுதாய் ஏற்கும் வரை
உனக்காய் -
காத்திருக்கவும் வேண்டும்.

இதலாமென்ன
எனக்கான லட்சியங்களா?

இல்லை இல்லை
நானென்பதன் அர்த்தம்
நீயும் தானே!
-------------------------------------------------------------

வித்யாசாகர்