இறுகுகின்றது சீன சிறிலங்கா உறவு: இப்போது வர்த்தகத் துறையில்

சிறிலங்காவின் சீனாவிற்கான ஏற்றுமதி கடந்த மூன்று வருடங்களில் குறிப்பிடத்தக்க அளவில் வளர்ந்துள்ளது.

2006 ஆம் ஆண்டு 37 மில்லியன் டொலராக இருந்த ஏற்றுமதி 2009 ஆம் ஆண்டு 70 மில்லியன் டொலராக அதிகரித்துள்ளது.

உலகப் பொருளாதாரத்தில் மந்த நிலை ஏற்பட்ட காலப்பகுதியில் கூட சீனாவுக்கான சிறிலங்காவின் ஏற்றுமதி அளவு அதிகரித்துள்ளது.

ஆனால், 2009 ஆம் ஆண்டில் சிறிலங்காவுக்கான சீனாவின் ஏற்றுமதி வீழ்ச்சி முகமாகவே காணப்பட்டது.

2007
முதல் 2009-ற்கு இடைப்பட்ட காலப்பகுதியில் சீனாவுக்கான ஏற்றுமதிக்
கட்டமைப்பில் மிகப் பெரிய அளவில் மாற்றங்கள் மேற்கொள்ளப்பட்டன;
ஏற்றுமதிக்கான பட்டியலில் மேலும் பல பொருட்கள் சேர்க்கப்பட்டன.

சீனாவின்
நுகர்வுச் சந்தையை இலக்காகக் கொண்டு புதிய ஏற்றுமதிப் பொருட்களை
அறிமுகப்படுத்துவதற்காக நன்கு திட்டமிடப்பட்ட விளம்பர நடவடிக்கைகளை
சிறிலங்கா இந்தக் காலப்பகுதியில் மேற்கொண்டது.



சிறிலங்காவிலிருந்து சீனாவுக்கு...
முன்னர், சீனாவிற்கு மூலப் பொருட்களே அதிகளவில் ஏற்றுமதி
செய்யப்பட்டன. மொத்த ஏற்றுமதியில் 40 விழுக்காடு மூலப் பொருட்களாகவே
காணப்பட்டது.

திட்டமிட்டு மேற்கொள்ளப்பட்ட இந்த விளம்பர
நடவடிக்கைகள் மூலம் தேயிலை, ரப்பர் போன்றவற்றை அடிப்படையாகக் கொண்ட
உற்பத்திப் பொருட்கள், ஆபரணக் கற்கள், மீன் தயாரிப்புக்கள், நகைகள்
போன்றவற்றை நோக்கி சீனாவுக்கான ஏற்றுமதி திரும்பி உள்ளது.

தமது
உற்பத்திப் பொருட்களை சீனாவில் விளம்பரப்படுத்துவதற்காக, சிறிலங்கா
வர்த்தக மற்றும் அபிவிருத்திக்கான கொள்கை வகுப்பாளர்கள் பீஜிங்கில் உள்ள
சிறிலங்கா தூதரகத்துடன் சேர்ந்து சீனா முழுவதும் கவனமாகத் தெரிவு செய்த
முக்கிய பல இடங்களில் வர்த்தகக் கண்காட்சிகளை நடத்தினர்.

சீன
வர்த்தக ஆதரவு அமைப்புக்களுடன் மிக நெருக்கமாகப் பணியாற்றிய சிறிலங்காத்
தூதரகம் அவர்களுடன் 12 புரிந்துணர்வு ஒப்பந்தங்களையும் செய்து கொண்டது.
அவற்றின் மூலம் சீன வர்த்தகக் கண்காட்சிகளில் சிறிலங்காப் பொருட்களுக்கு
இலவசமான காட்சி அறையை அல்லது மிகக் குறைந்த கட்டணத்துடனான காட்சி அறைகளைப்
பெற முடிந்துள்ளது.

இத்தகைய நடவடிக்கைகளை அடுத்த கடந்த மூன்று
வருட காலத்தில் சீனாவில் நடைபெற்ற ஆகக் கூடுதலாக 52 வர்த்தகக்
கண்காட்சிகளில் சிறிலங்காப் பொருட்கள் காட்சிப்படுத்தப்பட்டன. இவற்றில்
25 கண்காட்சிகள் கடந்த ஆண்டில் மட்டும் நடத்தப்பட்டவை.

இந்தக்
கண்காட்சிகளில் கலந்து கொண்ட பெரும் எண்ணிக்கையான சிறிலங்கா வர்த்தகர்கள்
சீனாவின் பல மாகாணங்களில் தமது பொருட்களைக் காட்சிப்படுத்தினர்.



படம்: Ministry of Commerce, People's Republic of China

2007 மற்றும் 2009 ஆம் ஆண்டுகளில் நடைபெற்ற தெற்காசிய
வர்த்தகக் கண்காட்சிகளில் முறையே 53 மற்றும் 60 வர்த்தகர்களுடன் சிறிலங்கா
கலந்து கொண்டது.

இத்தகைய வர்த்தகக் கண்காட்சிகளை வருடாந்தம்
நடத்த வேண்டும் என்று பீஜிங்கில் உள்ள சிறிலங்காத் தூதரகம் எடுத்த
முயற்சிகளுக்கு கடந்த ஆண்டு சாதகமான பதில் கிடைத்தது.

தமது
வருடாந்த குன்மிங் வர்த்தகக் கண்காட்சியுடன் இணைத்து இந்த வர்த்தகக்
கண்காட்சியையும் நடத்தலாம் என்று சீன வர்த்தகத் துறை அமைச்சு
அறிவித்துள்ளது.

சிறிலங்காவில் உள்ள வர்த்தக ஆதரவு
அமைப்புக்களுக்கும் சீனாவில் உள்ள அவர்களின் கூட்டாளிகளுக்கும் இடையிலான
ஒத்துழைப்புக்கள் புரிந்துணர்வு ஒப்பந்தங்கள் மூலம் மிகம் பெருமளவில்
வளர்க்கப்பட்டுள்ளது.

வர்த்தக மற்றும் முதலீட்டுத் துறை சார்ந்த
பிரதிநிதிகள் குழுக்களை இரு தரப்பும் வரவேற்பது, சிறிலங்காவின்
தொழிற்துறையின் பல்வேறு பகுதிகளையும் எப்படி அபிவிருத்தி செய்வது என்பது
தொடர்பில் தொழில் நுட்பங்களைப் பரிமாறிக் கொள்ள வசதியாக கவர்ச்சிகரமான
வர்த்தக மற்றும் முதலீட்டு உறவுகளையும் அனுசரணையையும் வளர்த்துக் கொள்வது
– ஆகிய விடயங்களை உள்ளடக்கி இந்தப் புரிந்துணர்வு ஒப்பந்தங்கள்
செய்யப்பட்டுள்ளன.

நடுத்தர வருமானம் கொண்ட சீன மக்களின் வருவாய்
அதிகரித்திருக்கும் நிலையில், சிறிலங்காத் தூதரகம் ஆபரணக் கற்களின்
விற்பனையை அங்கு முன்னகர்த்தி இருப்பது பெரும் பயனைத் தந்துள்ளது.

இதன்
மூலம் 2006 ஆம் ஆண்டில் 32ஆவது இடத்தில் இருந்த சீனாவிற்கான சிறிலங்காவின்
ஆபரணக் கல் ஏற்றுமதி கடந்த ஆண்டு செப்டெம்பர் மாதத்தில் 19ஆவது இடத்திற்கு
முன்னேறி உள்ளதாக ஆபரணக் கற்கள் மற்றும் நகைகள் அதிகார சபையின் புள்ளி
விபரங்கள் கூறுகின்றன.

டிசெம்பர் மாதத்துப் புள்ளி விபரங்களில்
மேலும் முன்னேற்றம் காணப்படக்கூடும். ஏனெனில் நவம்பரில் பீஜிங் மற்றும்
சங்காய் நகர்களில் நடைபெற்ற ஆபரணக் கற்கள் வர்த்தகக் கண்காட்சியில்
சிறிலங்கா நிறுவனங்களும் பெருமளவில் பங்கேற்றிருந்தன.

ஆகக் கூடுதலாக 20 சிறிலங்காவின் ஆபரணக் கல் நிறுவனங்கள் பீஜிங் கண்காட்சியில் கலந்து கொண்டிருந்தன.

இதற்கு மேலாக, சீனாவிற்கான தேயிலை ஏற்றுமதி வேகமும் பெருமளவில் அதிகரித்துள்ளது.

2006இல் 700,000 கிலோவாக இருந்த ஏற்றுமதி அளவு கடந்த வருடத்தில் 1,000,000 கிலோவாக அதிகரித்துள்ளது.

அதே சமயம், சீனப் பொருட்களுக்கான இறக்குமதித் தேவையும் பெருமளவில் காணப்படுகின்றது.

அதன் காரணமாக இரு நாடுகள் இடையிலும் வர்த்தக சமநிலை காணப்படவில்லை.

ஆனாலும், சிறிலங்காவின் சீன இறக்குமதியானது பெருமளவு முதலீட்டுப் பொருட்கள் சார்ந்ததாகவே இருக்கின்றது.

உழவூர்திகள், வாகன உதிரிப் பாகங்கள், இயந்திரங்கள், வேதியல் பொருட்கள் போன்றனவே சீனாவில் இருந்து இறக்குமதியாகின்றன.

இத்தகைய சீனப் பொருட்கள் சந்தையில் கடும் போட்டியை ஏற்படுத்துவதன் மூலம் சிறிலங்காவிற்கு மறைமுகமாக நன்மையையே கொண்டு வருகின்றன.

இவற்றுக்கு
உதவிகரமாக, பீஜிங்கில் உள்ள சிறிலங்காத் தூதரகம் வர்த்தகத்
திணைக்களத்துடன் இணைந்து இரு தரப்பு பொருளாதார ஆணைக் குழுவை
உருவாக்கியது. 8 வருட முயற்சிகள் தோல்வி அடைந்த பின்னர் 2008 ஆம் ஆண்டில்
அது உருவாக்கப்பட்டது.



படம்: Ministry of Commerce, People's Republic of China

அது மட்டுமின்றி சீனாச் சந்தைக்கு ஏற்றுமதி செய்யப்படும்
பொருட்களுக்கு விசேட சலுகைகளை, ஆசிய – பசுபிக் வர்த்தக ஒப்பந்தத்தின்
(Asia Pacific Trade Agreement (APTA) கீழ் பெற்றுக் கொடுக்க வர்த்தகத்
திணைக்களத்துடன் சேர்ந்து சிறிலங்காத் தூதரகம் பணியாற்றியது.

ஆசிய
– பசுபிக் வர்த்தக ஒப்பந்தத்தின் உறுப்பு நாடு என்ற வகையில் -
சிறிலங்காவின் தேயிலை, ஆபரணக் கற்கள், நகைகள், தென்னையை அடிப்படையாகக்
கொண்ட பொருட்கள், பழங்கள், கார வகைகள், மின்சாதன உதிரிப் பாகங்கள்
என்பவற்றுக்கு சீனா வரிச் சலுகையை வழங்கியது.

அனைத்துலகச்
சந்தையில் மேலும் சலுகைகளைப் பெறுவதற்கு சிறிலங்காவின் மேலும் 50
உற்பத்திப் பொருட்களுக்கான வாசல் இன்னும் திறந்தே இருக்கிறது.

சீனாவில்
கிடைத்திருக்கும் இந்த மிகப் பெரிய வாய்ப்புக் குறித்து
ஏற்றுமதியாளர்களிடம் விழிப்புணர்வு ஏற்பட்டுள்ளது. வர்த்தக ஆதரவு
அமைப்புக்கள் அந்த விழிப்புணர்வை ஏற்படுத்துகின்றன.

அதிலும்
குறிப்பாக ஆசிய – பசுபிக் ஒப்பந்தத்தின் கீழ் வழங்கப்பட்டுள்ள வரிச்
சலுகையால் வரிச் சுமை குறைக்கப்பட்டிருப்பது சிறிலங்காவின்
ஏற்றுமதியாளர்களுக்குக் கிடைத்துள்ள ஒரு பெரும் வாய்ப்பு.

சீனாவிற்கு
ஏற்றுமதி செய்யப்படும் எல்லாப் பொருட்களும் சிறிலங்காவின் உற்பத்திப்
பொருட்கள் தான் என்பதை வர்த்தகத் திணைக்களம் உறுதிப்படுத்துகின்றது.

சீனாவுடன்
கூட்டு வர்த்தகத்தில் ஈடுபடுவதற்கும் முதலீட்டில் ஈடுபடுவதற்குமான
வழியையும் ஆசிய – பசுபிக் வர்த்தக ஒப்பந்தம் ஏற்படுத்திக் கொடுத்துள்ளது.


இரு தரப்பு கூட்டு வர்த்தக நடவடிக்கைகளின் கீழ், வீட்டுக்கான மின்
இணைப்புப் பொருட்கள், தோற் பொருட்கள், விவசாய இயந்திரங்கள்,
உந்துருளிகள், செப்புப் பொருட்கள், பளிங்குக் கற்கள், அலுமினியப்
பொருட்கள், ஆடைகள், காலணிகள் போன்ற சிறிய தொழிற்துறைப் பொருட்களுக்கு
வாய்ப்புக்கள் அதிகம் உள்ளன.

நான்கு கட்டங்களாகச் சீனாவுடன்
நடத்தப்பட்ட பேச்சுக்களின் விளைவாக இந்த ஆண்டு முதல் மேலும் வரிச்
சலுகைகள் சிறிலங்காப் பொருட்களுக்குக் கிடைக்கும் என
எதிர்பார்க்கப்படுகிறது.



படம்: Ministry of Commerce, People's Republic of China

இரு நாடுகளுக்கும் இடையிலான உறவுகளில் 2007ஆம் ஆண்டு
மிகவும் முக்கியமான. இரு தரப்பு ராஜீய உறவுகள் ஏற்படுத்தப்பட்டு 50
ஆண்டுகள் அப்போதே நிறைவடைந்தது.

அந்த நிகழ்வைச் சிறப்பிக்கும்
வகையில் சீனாவிற்குப் பயணம் செய்த குடியரசு அதிபர் மகிந்த ராஜபக்ச, கடந்த
மூன்று ஆண்டுகளில் மேலும் இரு தடவைகள் சீனாவிற்குப் பயணம் செய்துள்ளார்.

அத்துடன்
பிரதமர் ரட்ணசிறி விக்கிரமநாயக்க இரண்டு தடவைகள் சீனாவிற்குப் பயணம்
மேற்கொண்டதும் இரு நாடுகளுக்கும் இடையிலான நட்புறவுவை மேலும்
பலப்படுத்துவதற்கான அரசியல் சூழலை ஏற்படுத்தியது.

இரு
நாடுகளினதும் வர்த்தக மற்றும் அபிவிருத்தித் துறை அமைச்சர்களும்
வெளிவிவகாரத் துறை அமைச்சர்களும் கடந்த ஆண்டில் மேற்கொண்ட பயணங்கள்
இந்தப் பிணைப்பை மேலும் வலுப்படுத்தின.

சிறிலங்காவிற்கும் சீன மக்கள் குடியரசுக்கும் இடையிலான உறவுகள் இந்த நடவடிக்கைகளின் மூலமாக மேலும் வெளிச்சத்திற்கு வந்தன.